Observadór Internasionál kongratula povu Timor-Leste ba sivilidade iha aktu eleitorál

DILI, 23 maiu 2023 (TATOLI)—Observadór Internasionál sira-ne’ebé hala’o kna’ar iha Misaun Rede Bodies Jurisdictional no Administrasaun Eleitoral (MOE-ROJAE) no Komunidade Paises Lian Portugés (CPLP) fó parabéns ba povu no autoridade sira-ne’ebé hala’o eleisaun ho sivilidade iha aktu eleitorál.

“Ami-nia parabéns mós habelar ba autoridade no instituisaun sira-ne’ebé halo intervensaun iha nivél oioin iha prosesu eleitorál. Ami fó parabéns ba povu Timor-Leste no autoridade sira-ne’ebé hala’o eleisaun ho sivilidade iha aktu eleitorál,” Xefe EOM- ROJAE, Cristina Leite, hatetren iha konferénsia imprensa ne’ebé hala’o iha Hotel Novo Turismo, Dili, tersa ne’e.

Nia louva Komisaun Nasionál Eleisaun (CNE) tanba servisu ne’ebé hala’o tiha ona hodi superviziona aktu eleitorál, iha ezerse nia kompeténsia, sirkunstánsia ida-ne’ebé merese fó konfiansa ba forsa polítika.

Iha parte seluk, Xefe EOM-CPLP, José Marcos Barrica, lori nia naran fó parabéns ba autoridade timoroan sira-ne’ebé hala’o eleisaun livre no transparensia, bazeia ba prosesu kredivél ida-ne’ebé permite partisipasaun ne’ebé luan.

“Direitu ba votasaun, kontribui ba reforsa demokrasia no Estadu direitu iha nasaun ne’e, tanba ne’e ba koezaun no afirmasaun Timor-Leste,” nia hateten.

Jornalista : Osória Marques

Editór      : Cancio Ximenes