iklan

EKONOMIA, HEADLINE

Grupu sia hetan fundu hosi SEA implementa programa rua

Grupu sia hetan fundu hosi SEA implementa programa rua

Serimónia asina akordu subvensaun entre SEA no grupu benefisiáriu hodi implementa programa, iha salaun SEA, Akait. Imajen Tatoli/Arminda Fonseca

DILI, 26 maiu 2023 (TATOLI)—Sekretaria Estadu Ambiente (SEA) liuhosi Sentru Edukasaun no Informasaun Ambientál (CEIA, sigla portugés), sesta ne’e, asina akordu ho grupu benefisiáriu sia hodi impelementa pakote rekuperasaun ekonomia liuhosi programa eskola verde no bairru verde iha munisípiu neen.

“Objetivu prinsipál hosi atividade ne’e mak atu kuidadu ita-nia ambiente iha Timor-Leste, ne’ebé envolve jerasaun foun sira hanesan estudante no grupu brigada ambientál sira hodi halo asaun projete ambiente sira, liuliu lixu nune’e labele fó riksu ba biodiversidade tasi,” Diretora CEIA, Amenica Machado Fernandes, informa ba Agência Tatoli, iha ninia knaar fatin, Acait.

Programa rua ne’e hanesan inisiativa hosi SEA, ne’ebé tinan ne’e aloka orsamentu liuhosi CEIA hamutuk $33.000 ba grupu benefisiáriu sia.

Grupu benefisiáriu sia ne’e kompostu hosi lima sei implementa programa atividade eskola verde no haat sei implementa atividade bairru verde.

Notísia relevante : SEA hili eskola haat hodi implementa programa ‘eskola matak’

Grupu ne’ebé impelementa atividade eskola matak mak hanesan Diklidun sei impementa iha Ensinu Báziku Filiál (EBF) Cacae Uma Barique munisípiu Manatuto ho montante orsamentu $3.000, Grupu Birigada Ambientál sei implementa iha EBF 1,2,3 Ailuli Same ho orsamentu $5.000.

Grupu Akitou sei implementa programa eskola matak iha Sensinu Báziku Sentrál (EBC, sigla portugés) 12 outubru Tasi-Tolu ho orsamentu $3.000, Grupu Kreativu Juventude Leorema sei implementa programa eskola matak iha Eskola Tekniku Vokasionál (TEKVOK) Agríkola Leorema Liquiçá ho orsamentu $3.000, no Grupu Hadomi Eskola sei implementa iha EBC 1,2,3 Lontale Covalima ho orsamentu $3.000.

Nune’e, ba grupu haat ne’ebé implementa programa rua ne’e foku liu ba estabelesimentu jardin verde mak hanesan Grupu Leno Dalan Bross sei implementa iha eskola Metinaro, Dili ho nia orsamentu hamutuk $3.000, Grupu Youth Plant Lovers sei impelementa jardin iha Kampu Alor Dili orsamentu $3.000.

Grupu Brigada Ambientál sei implementa jardin iha suku Holsa Bobonaro ho orsamentu $5.000, no Grupu Brigada Ambientál Liquiçá sei  implementa iha suku Dato Liquiçá ho orsamentu $5.000.

“Ohin benefisiáriu sira asina ona akordu no sei impleta to’o setembru 2023,” nia akresenta.

Iha fatin hanesan, Xefe Grupu Brigada Ambientál Liquiçá, Livorio Jesuito de Oliveira Castro, kontente tanba bele hetan fundu hosi SEA hodi implementa ba iha jardin matak.

“Ami sente kontente, tanba ne’e orsamentu ne’ebé ami hetan hosi SEA ami sei halo resiklajen lixu sira liuliu roda, botir no seluk tan hodi ita tranformsa sai jardin ne’ebé di’ak.

Aleinde ne’e, sira mós sei halo sosializasaun ba komunidade iha sira-nia suku atu iha konsiénsia tau lixu iha nia fatin nune’e labele estraga ambiente liuliu biodiversidade tasi nian.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!