RAEOA kontribui rihun $113-resin liuhosi leilaun veíkulu Estadu
OÉ-CUSSE 26 maiu 2023 (TATOLI) – Diresaun Rejionál Patrimóniu Estadu, Rejiaun Administrativa Espesiál Oé-Cusse Ambeno (RAEOA), kontribui reseita $113,651.15 ba kofre Estadu liuhosi leilaun veíkulu Estadu hamutuk karreta unidade 17 ne’ebé tama ona kondisaun leilaun.
Diretór Rejionál Patrimóniu Estadu Oé-Cusse, Dionísio Maniqui, hatete, molok loke konkursu públiku ba serbisu leilaun bens movel Estadu nian.
Diresaun Rejionál Patrimóniu Estadu Oé-Cusse serbisu hamutuk ho Diresaun Jerál Patrimóniu Estadu Nasionál, bazea dekretu-lei númeru 32/2011, loron 27 fulan jullu 2011, kona-bá jestaun no alienasaun ba bens movel Estadu nian.
“Iha janeiru ami loke anúnsia ba públiku ba leilaun karreta Estadu de’it unidade 26, maibé unidade 17 mak iha interese ema hola, ho nia taxa kontribui ba kofre Estadu hamutuk $113,651.15, agora hela sia (9) mak seidauk hola,” Dionísio Maniquin, hatete, iha Oé-Cusse, sesta ne’e.
Tuir nia, veikulu Estadu hurak-ne’e, patrimóniu Estadu loke ba funsionáriu públiku, povu bainbain maibé barak liu mai hosi emprezáriu sira, nia rezultadu mak karreta unidade 17 ne’e leilaun ona hela karreta sia.
“Kona-bá karreta sia ne’e, ami tau ba planu períodu mai, sei tau hamutuk ho motorizada hamutuk unidade 157, ami mós hato’o tiha ona ba nasionál, atu lansa hafoin eleisaun ne’e hotu, entaun sei akontese iha tempu badak,” nia katak.
Nia informa, molok halo leilaun ba veíkulu Estadu hirak-ne’e, Diresaun Patrimóniu Estadu Rejionál, serbisu hamutuk ho ekipa diresaun nasionál halo verifikasaun ba kondisaun sira, kona-bá ida-ne’ebé maka kondisaun tama leilaun tau hamutuk iha armazein, hafoin halo publikasaun ba publiku.
“Sasán hirak-ne’e, liu ona tinan utilizasaun, tanba bazea lei, kada tinan lima bele halo ona leilaun, maibé balu sei kondisaun di’ak, maibé foin daudaun ne’e balu liu ona tina lima,” nia dehan.
Entretantu, iha leilaun faze tuir ba motrorizada sira unidade 157 ne’e, ekipa komisaun sei loke konkursu prioridade uluk ba funsionáriu públiku sira, maka hafoin loke ba públiku.
Jornalista: Abílio Elo Nini
Editór: Evaristo Soares Martins
