Top

2022: Gabinete Sentrál Kombate Korrupsaun-Kriminalidade Organizadu rejista kazu 115

Uma Fukun Parlamentu Nasionál. Imajen Egas Cristovão

DILI, 12 juñu 2023 (TATOLI)—Durante tinan 2022, Gabinete Sentrál Kombate Korrupsaun no Kriminalidade Organizadu iha Prokuradória Jerál Repúblika (PJR) rejista prosesu kazu tama hamutuk 115.

Hanesan temi iha artigu 78º hosi Estatutu Ministériu Públiku nian, Gabinete Sentrál Kombate Korrupsaun no Kriminalidade Organizadu iha ninia inkumbénsia eskluzivu atu dirije inkéritu sira no ezerse asaun penál relativu ba krime korrupsaun sira ne’ebé definidu iha Lei nº 7/2020, loron-26, fulan-agostu (krime hirak ne’ebé komete iha ezersísiu funsaun públiku) no mós krime sira hosi asosiasaun kriminoza, terrorizmu, organizasaun terrorista no finansiamentu terrorizmu, brankeamentu kapitál, tráfiku estupefasiente, tráfiku ema, falsifikasaun dokumentu públiku sira, fraude fiskál, kontra bandu no deskamiñu, administrasaun danoza infrasaun ekonómiku-finanseiru hosi dimensaun internasionál ka transnasionál no administrasaun danoza iha unidade, servisu sira ka ema ka hosi utilidade públiku, bainhira konsumadu iha sirkunskrisaun judisiál Dili nian, ka bainhira akontese iha sirkunskrisaun judisiál territóriu nasionál nian, iha kazu hirak ne’e, dezdeke montante sira-ne’ebé envolvidu superiór hosi $10.000 ka ninia ajente sira nu’udar titulár ka membru hosi órgaun soberania balun.

Iha Gabinete Sentrál Kombate Korrupsaun no Kriminalidade Organizadu, durante tinan 2022, Prokuradór Repúblika nain lima no ofisiál justisa na’in-12 mak ezerse funsaun sira no gabinete ne’e funsiona iha dependénsia ierárkika direta hosi Adjunta Prokuradór-Jerál Repúblika.

“Durante tinan 2022, tama iha Gabinete Sentrál prosesu 115 ne’ebé hosi hirak ne’e 56 kona-ba krime hirak ne’ebé komete bainhira hala’o kna’ar públiku sira (jenerikamente dezignadu hanesan, krime korrupsaun) no prosesu 59 seluk kona-ba krime ho tipolojia seluk ne’ebé kabe ba kompeténsia gabinete ninian no mós atribuidu superiormente,” refere relatóriu anuál Ministéiru Públiku (MP) ne’ebé aprezenta ba Parlamentu Nasionál, segunda ne’e.

Iha análize komparativu breve ida, konsta katak númeru totál hosi prosesu hirak ne’ebé tama iha Gabinete Sentrál iha tinan-2022 (115) menus hosi tinan 2021 (143).

Maibé mós iha tinan-2022 númeru hosi prosesu enserradu sira hamutuk (151) aumenta kompara ho tinan anteriór ne’ebé ho totál (138), nune’e iha kontajen finál, rejista redusaun pendénsia ida no tranzita tiha ba tinan-2023 inkéritu hamutk (151).

“Hosi inkéritu-krime enserradu 151, termina ona ho despaxu akuzasaun hamutuk 88 no 63 ho despaxu arkivamentu. Interpoin tiha rekursu 16 no 10 hetan resposta ba rekursu ne’ebé hato’o hosi parte arguidu sira’’relatóriu MP ne’e haktuir.

Durante tinan 2022, majistradu sira Ministériu Públiku nian ne’ebé servisu iha Gabinete Sentrál realiza tiha dilijénsia inkéritu hamutuk 199 no sira partisipa iha sesaun julgamentu hamutuk 411, delega tiha ba órgaun sira polísia kriminál no ba ofisiál justisa sira-ne’ebé servisu iha Gabinete inkéritu 160, hanesan espesifika 90 ba Komisaun Antí-Korrupsaun (CAC), 52 ba Polísia Sientífika no Investigasaun Kriminál, 13 ba PNTL– Servisu Investigasaun Kriminál no lima ba ofisiál justisa sira.

Komisaun Antí-Korrupsaun konklui tiha besik pursentu 28% (ka 45) hosi inkéritu hirak ne’ebé delega tiha ba Polísia Sientífika no Investigasaun Kriminál besik 20% (ka inkéritu 33 mak delega ba sira), PNTL/Servisu Investigasaun Kriminál 6% (ka inkéritu 10 mak delega ba sira) no ofisiál justisa sira besik 2% (ka inkéritu 4 mak delega ba sira).

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!