iklan

NASIONÁL, HEADLINE

Ema ho defisiénsia sira lakon inan inspiradora

Ema ho defisiénsia sira lakon inan inspiradora

Misa ‘requiem’ ba matebian Isabel Fereira. Imajen Tatoli/António Daciparu

DILI, 21 juñu 2023 (TATOLI) – Ema nia otas hanesan duut ne’ebé mosu, hanesan ai-funan iha toos laran bainhira anin huu bosok nia lakon, nia fatin buka la hetan. Realidade moruk ida ne’e lori tristeza boot ba ema hotu, nune’e mós ba ema ho defisiénsia sira, tanba lakon ona inan inspiradora Isabel Ferreira ne’ebé fó ona apoiu morál ba sira durante ne’e.

Gabriel de Araújo, ema ho defisiénsia lakonsege subar nia sentimentu lakon ba nia motivadora ne’ebé sempre akompaña sira iha tempu saida de’it.

Amizade, kariñu no motivasaun ne’ebé fó husi Isabel Ferreira ba ema ho defisiénsia sira, liuhusi Organizasaun Naroman ba Futuru sai hela ba memória entre sira.

Tan sente katak buat ne’ebé sira hetan husi Isabel Ferreira nu’udar inspirasaun ida hodi fó barani ba sira atu hakat bá oin.

Gabriel de Araújo, ema ho defisiénsia.

“Ohin bá oin ami defisiénsia Naroman ba Futuru la haree tan ona nia oin, ami la rona tan ona nia lian no la sente tan ona ninia domin, maibé ninia memória sei rai nafatin iha ami-nia fuan hodi haforsa nafatin ami atubele hakat bá oin”, Gabriel Araújo espresa nia sentimentu lakon iha entrevista ho Tatoli bainhira partisipa misa requiem falesida Isabel nian iha igreja Balide.

Nia konta katak ema ho defisiénsia iha Naroman ba Futuru durante ne’e toman ho matebian nia prezensa, tan sempre ko’alia sira ho grupu nomós indivídu. “Ami simu barak liu maka ninia motivasaun sira, duké materiál bainhira iha difikuldade ruma tanba sempre husu ba nia. Ami la hatene sé mak bele akompaña tan ami. Karik iha mós hanesan nian ka la’e, tanba ami ho kondisaun fízika hanesan ne’e barani enfrenta moris tanba ninia motivasaun”, nia hatete.

Hanesan Gabriel Araújo konta tuir matebian nia liafuan ne’ebé sempre hato’o ba sira “moris iha mundu ne’e ema ida-idak mak hala’o, la haree ba kór, rasa. Ema ho defisiénsia iha nafatin direitu atu hetan moris, nune’e labele pesimista.  Tanba ne’e, tenke hahú husi ema ida-idak, komesa agora, se la’os ami, sé tan, se laos agora, bainhira tan, liafuan sira ne’e sai osan-mean ida mai ami”.

Maske lakon inan di’ak ida, maibé ba Gabriel Araújo sei hato’o liuhusi orasaun atu husu falesida sempre akompaña nafatin sira no nia husu ba santu sira hotu mai akompaña matebian to’o ninia fatin ikus ne’ebé hakmatek no ho domin iha reinu lalehan.

Notísia relevante:  Saudoza Isabel Ferreira aban halot iha Semitériu Becusse

Isabel da Costa Ferreira termina ona ninia peregrinasaun iha mundu ne’e iha 18 juñu tanba sofre kankru. Ohin, família, kolega no ema hotu iha rai doben Timor-Leste sai sasin ba ninia deskansa ikus iha kampa ne’ebé prepara ona iha semitériu Becusse.

Mate ida ne’e halo ema hotu labele simu, maibé ida ne’e mak moris ema kriatura iha mundu ida ne’e. Hanesan Roma 14:7-9 hatete “tanba laiha ema ida entre ita maka moris ba nia aan rasik, no laiha ema ida mak mate ba nia aan rasik. Tanba se ita moris, ita moris ba Maromak, no se ita mate, ita mate ba Maromak. Só, mate ka moris, ita Maromak nian. Tanba ne’e Kristu mate ona no moris hias fali, nune’e Nia sai Maromak, ba ema sira ne’ebé mate no ba ema sira ne’ebé moris”.

Notísia relevante: Adeus lutadora Direitu Umanu, Adeus inan-doben Isabel Ferreira!

Jornalista: Tome Amado   

Editora: Maria Auxiliadora

iklan
iklan

Leave a Reply

iklan
error: Content is protected !!