Deputada Bendita Magno: “Feto mós bele lidera lejislatura daneen”
DILI, 22 juñu 2023 (TATOLI)—Deputada hosi Partidu CNRT, Bendita Magno, hateten Timor-Leste hatudu feto mós bele tanba bele eleitu no lidera lejislatura daneen sai hanesan Prezidente Parlamentu Nasionál (PPN).
Notísia Relevante: Maria Fernanda Lay feto dahuluk lidera lejislatura daneen
Tanba ne’e, nia husu ba feto Timor-Leste hotu-hotu atu iha loron aban bele kompete iha asembleia munisipál ne’ebé sei realiza iha tinan 2024.
“Tanba, ohin, Deputada Maria Fernanda Lay hanesan feto dahuluk ne’ebe eleitu hodi lidera Parlamentu Nasional, ho ne’e ha’u husu ba feto Timor-Leste atu kompete iha assembleia munisipál iha 2024, hodi hatudu no envolve aan tanba agora hatudu ona katak ita feto mós bele,” Bendita Magno hateten ba Agência Tatoli, hafoin reuniaun dahuluk lejislatura daneen, iha resintu PN, kinta ne’e.
Deputada re-eleitu ne’e hatutan, durante ne’e sosiedade sivil inklui entidade hotu-hotu no ema hotu luta katak feto tenke iha númeru 3 hosi númeru 1 no 2 hosi mane, maibé iha Timor-Leste iha loron 22 juñu 2023 hatudu ba mundu katak feto Timor-Leste mós bele.
“Ita feto mós bele tanba hatudu ona ba mundu liuliu ba ita feto Timor-Leste katak iha segundu órgaun soberanu ne’ebé pela primeira vez ne’ebé lidera hosi Fernanda Lay,” nia dehan.
Jornalista : Osória Marques
Editór : Cancio Ximenes
