KHUNTO sei defende povu nia lian iha Parlamentu Nasionál

DILI, 23 juñu 2023 (TATOLI)—Deputadu bankada KHUNTO nu’udar bankada opozisaun iha Parlamentu Nasionál (PN) lejislatura daneen, Deputadu António Verdiál de Sousa, hateten sei defende povu nia lian iha lijislatura daneen ne’e.
“Deputadu ne’e hanesan fiskalizadór, halo desizaun polítika, halo lei no aprova orsamentu. Liafuan ida fiskalizadór ne’e mak ha’u hatete katak reprezenta bankada KHUNTO sei sai nafatin ba lian ba lian laek sira,” Nia hateten ba jornalista sira iha uma fukun Parlamentu Nasionál, sesta ne’e.
Bankada KHUNTO nia pozisaun nu’udar opozisaun iha lejislatura daneen ne’e mak hakarak partisipa iha dezenvolvimentu nasaun.
“KHUNTO hakarak partisipa iha prosesu dezenvolvimentu Estadu direitu demokrátiku, KHUNTO iha hanoin atu apoiua Governu sé de’it mak atu ba ukun, KHUNTO nafatin prontidaun suporta atu nune’e dezenvolvimentu la’o ba oin,” nia hateten.
Nune’e, nia hateten, KHUNTO vota a-favór ba programa Governu ninian ne’ebé sei lori ba iha Parlamentu Nasionál.
Deputada opozisaun hosi bankada PLP, Maria Angelina Sarmento, seidauk bele ko’alia pozisaun PLP hanesan opozisaun iha lejislatura daneen ne’e atu apoiu sé, maibé klaru PN presiza duni opozisaun ida forte.
“Atu apoiu ne’e, ha’u seida’uk bele pronúnsia maibé klaru iha Parlamentu presiza duni opozisaun ida forte haree ba konfigurasaun polítika ida-ne’ebé CNRT maiória hetan tan apoiu hosi PD. Klaru, bankada sira seluk atua mós opozisaun ida kualidade no bele halo balansu iha Parlamentu Nasionál,” nia hateten.
Nia dehan, tambá Estadu ida-ne’e prinsípiu Parlamentu Nasionál nia kna’ar mak hanesan duni opozisaun tanba nia fiskaliza aktu Governu, ne’ebé opozisaun la nesesariamente bankada opozisaun mak tenke sai opozisaun maibé bankada Governu mós kuandu haree fiskaliza aktu Governu ne’ebé iha buat balun la loos, nia iha tempu balun bele atua mós hanesan tanba natureza Parlamentu Nasionál nu’udar órgaun lejisladór no fiskalizadór.
Jornalista : Nelson de Sousa
Editór : Cancio Ximenes

