iklan

MUNISÍPIU, VIQUEQUE

Servisu MAP Viqueque presiza armazén haloot ai ne’ebé hetan apreensaun

Servisu MAP Viqueque presiza armazén haloot ai ne’ebé hetan apreensaun

VIQUEQUE, 23 juñu  2023 (TATOLI)—Servisu Ministériu Agrikultura no Peska (MAP) Viqueque presiza armazén hodi haloot ai ilegál ne’ebé durante ne’e abitante balun tenta mobiliza no ekipa responsável halo apreensaun.

“Ami laiha armazén ida hodi haloot ai sira-ne’ebé ami halo apreensaun durante ne’e, nune’e rai de’it iha li’ur. Ai ne’ebé ita halo apreensaun tenke rai didi’ak tanba ita aplika multa ba na’in sira, maibé tanba laiha fatin, tenke kona udan no rai manas halo ai sai a’at,” Xefe Departementu Planta no insdústria hosi Servisu MAP Viqueque, Helder Daniel Amaral, informa iha ninia knaar fatin, Edifísiu Servisu MAP Viqueque, Beloi, sesta ne’e.

Notísia relevante : Guarda Florestál Viqueque halo apreensaun ai kúbiku lima

Nia haktuir, daudaun ne’e iha ai kúbiku neen hosi tinan kotuk rai hela iha edifísiu li’ur sein iha protesaun tanba fatin haloot laiha.

“Bainhira ai sira-ne’e rai iha li’ur bele sai dodok no ninia presu ai bele tun tanba la prezerva ho di’ak. Tanba ne’e ami presiza armazén tanba ai sira ne’e banhira ai na’in sira la mai multa, automátika sei sai patrimóniu Estadu nian. Ita presiza prezerva ai sira atu labele a’at no ninia valór ekonómiku labele tun,” nia akresenta.

Maski nune’e, durante ne’e Servisu MAP Viqueque halo esforsu kria planu hodi husu orsamentu ba nasionál hodi harii armazén ida, maibé hosi parte ne’ebá dehan orsamentu limitadu.

“Hosi preokupasaun ne’e, ha’u prefere Governu foun mai bele tau orsamentu hodi harii armazén rai ai sira-ne’ebé ami halo apreensaun hosi komunidade ne’ebé tesi no tula ai ilegál,” nia tenik.

Servisu MAP Viqueque iha tinan 2023 seidauk identifika ema tula ai ilegál, maibé iha tinan 2022 konsege halo apreensaun ba ai kúbiku neen, ne’ebé daudaun rai hela iha edifísiu Servisu MAP Viqueque.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!