Projetu ponte Noetoko iha Nítibe atinje pursentu 67
OÉ-CUSSE, 30 juñu 2023 (TATOLI) – Projetu ponte Noetoko ne’ebe lokaliza iha aldeia Kuanobe, suku Ban-Afi, sub-rejiaun Nítibe Rejiaun Administrativa Espesiál Oé-Cusse Ambeno (RAEOA) daudaun ne’e nia progresu fizíku atinje ona 67%.
Notísia relevante: Autoridade RAEOA hatuur fatuk dahuluk ba projetu ponte Noetoko
Diretór kompañia Lifau Indah Unipesoál Lda, Fernando Mak, hateten, projetu ponte Noetoko nia distánsia naruk metru 120 kompleta ho gabiaun protesaun metru 160.
“Ponte Noetoko nia progresu atuál agora ne’e to’o 67%, inklui ponte ki’ik rua, Neofmetan, maibé ami konsentra uluk ba ponte boot Noetoko depois maka kontinua fali ba ponte kiik rua ne’e,” Fernando Mak, realata progresu ne’e ba autoridade RAEOA iha Oé-Cusse, kinta ne’e.
Hosi pursentu 67 ne’e, agora monta ekipamentu ponte nian, ne’ebé semana oin bele hotu, depois halo hotu nia serbisu seluk, no halo ateru ba leten ita-bele kompleta ona konstrusaun ne’e.
Notísia relevante: Konstrusaun ponte Bitopa Oésilo konklui iha setembru
Diretór Lifau Indah, garante sei konklui projetu ponte Noetoko iha fulan outubru 2023 hodi entrega ba autoridade, nune’e komunidade sira bele uza ona.
“Ami asina kontratu iha novembru 2022, maibé ami labele hahú kedas tanba situasaun udan, mota mós tun, ami labele halo entaun ami bele komesa fali iha fulan maiu 2023 ne’e, tanba projetu ne’e iha mota bee sei eziste, ami tenke hein, maibé agora tempu bailoron ona, ne’ebé antes fulan outubru ami tenke remata ona, kuandu tama tempu udan komunidade bele uza ona,” nia garante.
Jestór sub-rejiaun Nítibe, Teodoro Sila, orgullu, tanba iha 2022 no 2023 suku Ban-Afi hetan projetu boot rua, hanesan reabilitasaun estrada rurál no ponte Bitopa.
“Ami agradese ba Autoridade RAEOA, ha’u fiar katak projetu rua ne’e tulun tebes komunidade iha sub-rejiaun Nítibe liuliu iha tempu udan, bele lori sira-nia produtu asesu ba merakdu iha vila,” nia orgullu.
Entretantu, projetu ponte Noetoko kompañia Lifau Indah Unip, Lda ho valór kontratu $625,451.54, osan ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun servisu durante fulan neen.
Notísia relevante: Autoridade RAEOA hatuur fatuk dahuluk reabilita estrada rurál ba sub-rejiaun tolu
Jornalista : Abílio Elo Nini
Editor : Evaristo Soares Martins
