VIQUEQUE, 18 jullu 2023 (TATOLI)—Sekretaria Estadu Igualdade (SEI) serbisu hamutuk organizasaun internasionál United Nations Development Programme (UNDP), tersa ne’e, reativa filafali grupu traballu bazeia ba jéneru iha munisípiu Viqueque.
Xefe Departamentu Prevensaun Violénsia Bazeia Jéneru hosi SEI, Isabel Adaljiza, esplika, grupu traballu ne’e implementa liuhosi programa spotlight hodi integra planu asaun nasionál violénsia bazeia ba jéneru kada tinan iha munisípiu maibé implementasaun programa spotlight iha tinan-tolu liubá ladún la’o.
“Ho ida-ne’e ohin ami reativa filafali grupu traballu bazeia ba jéneru ne’ebé maka eziste iha munisípiu Viqueque. Forma grupu traballu bazeia ba rezolusaun Governu númeru 35/2017. Tanba ne’e ha’u mai ho ekipa tenke hosi SEI hodi haree implementasaun programa spotlight iha Viqueque hodi reativa filafali atividade sira,” Isabel Adaljiza hateten liuhosi ninia diskursu iha ámbitu reativa grupu traballu bazeia ba jéneru, iha salaun administrasaun Viqueque, tersa ne’e.
Notísia relevante : Governu sensibiliza planu asaun nasionál violénsia bazeia ba jéneru iha Covalima
Ministristériu lima mak sei implementa planu asaun hanesan Ministériu Justisa (MJ), Ministériu Administrasaun Estatál (MAE), Ministériu Interiór (MI), Ministériu Solidaridade Sosiál no Inkluzaun (MSSI) no Ministéri Edukasaun Juventude no Desportu (MEJD).
“Ami fó kapasitasaun ba grupu traballu sira iha munisípiu Viqueque hodi hasa’e koñesimentu kona-ba knaar, estrutura no membru grupu traballu ne’ebé iha planu asaun anuál iha Viqueque,” nia akresenta.
Inisiativa hosi programa spotlight iha Timor-Leste mak atu redús violénsia doméstika no parseiru íntimu, nune’e mós kona-ba violénsia hasoru labarik, feto no feto foin-sa’e sira, inklui halo mudansa hahalok iha nível individuál no komunidade mak xavi atu atinje objetivu ne’e.
Tanba ne’e konsulta ho membru komunidade no líder sira iha munisípiu Viqueque atu ajuda grupu traballu dezenvolve estratejia komunikasaun kona-ba mudansa hahalok ne’ebe sei uza atu hasa’e konsiénsia no promove norma sosiál igualdade jéneru, atitude no hahalok. Programa spotlight ne’ebé hahú implementa iha tinan 2017-2021 iha munisípiu tolu hanesan Bobonaro, Ermera no munisípiu Viqueque.
Iha fatin hanesan, Sekretáriu Administradór munisípiu Viqueque, Teotoni Sarmento da Silva, liuhosi formasaun ba grupu traballu bele implementa iha baze hodi redús violénsia hasoru labarik, feto no feto foin-sa’e sira.
“Dala barak problema mosu iha baze hanesan, dadeersan sai bá serbisu laen la matabixu bá liu to’os no natar, fila bá uma haree han kalan laiha. Komesa mosu problema hasoru feto, nune’e akontese beibeik maka ha’u ko’alia. Tanba ne’e liuhosi formasaun sira-ne’e bele loke ita-nia hanoin no fila tenke implementa hodi ita bele redús violénsia iha ita-nia munisípiu. Ha’u mós sei ko’alia ho administradór munisípiu atu ita mós diskute iha Konsellu Konsultivu munisípiu Viqueque ba violénsia bazeia ba jéneru,” nia tenik.
Atividade reativa grupu traballu ne’e hetan apoia hosi UNDP hodi realiza formasaun, ne’ebé formadór hosi SEI no Ministeriu Finansa (MF).
Formasaun ne’e hetan partisipasaun hosi Administór postu Ossu, Uatulari no Lacluta, membru Polísia Nasioál Timor Leste (PNTL) no Diretór liña ministeriál sira iha munisísipiu Viqueque. Formasaun ne’e sei hala’o durante loron-haat, hahú loron 18 to’o 21 jullu.
Jornalista : Vitorino Lopes da Costa
Editora : Julia Chatarina
