DILI, 20 jullu 2023 (TATOLI)—World Vision Timor-Leste (WVTL) rekomenda ba IX Governu Konstitusionál atu aprova dekretu-lei Governu nian atu nune’e bele implementa lei protesaun ba labarik no joven iha perigu ne’e ho di’ak.
Notísia Relevante: Sensibilizasaun projetu-lei protesaun ba labarik sei hein Governu foun
Espesialista ba Jéneru no Protesaun Labarik iha WVTL, Joana Camões, hateten WVTL hein atu implementa lei protesaun labarik númeru 29/V (3a) Protesaun Labarik no Joven sira iha situasaun perigu, no lei ne’e hetan aprovasaun hosi Parlamentu Nasionál iha fulan-fevereiru 2023.
“Nune’e, ita hein katak Governu foun sei aprova dekretu-lei ida ba implementasaun. Tanba ne’e ami sei ba atu fornese sensibilizasaun no fahe informasaun kona-ba lei sira kona-ba protesaun labarik ba komunidade inklui inan-aman sira,” Joana Camões hatete ba Agência Tatoli, iha Comoro, kinta ne’e,
WVTL hein IX Governu liuhosiKkonsellu Ministru sei aprova dekretu-lei ida ba implementasaun Lei Protesaun Labarik hodi tulun parseiru dezenvolvimentu sira atu implementa programa sensibilizasaun iha komunidade.
Hodi hein dekretu-lei ne’e, WVTL agora daudaun foka liu ba servisu besik ho foinsa’e sira iha Maliana, Balibo, no munisípiu sira seluk atu ajuda foinsa’e sira atu kria interasaun pozitivu ho ema seluk no evita hanoin negativu, harii servisu ekipa no mós promove lideransa.
WVTL identifika impaktu sira harii relasaun amigavel no fahe ideia no mós hala’o karáter lideransa ba foinsa’e sira hodi planea atividade sira no hamutuk ho labarik no foinsa’e sira.
“Ita implementa hela programa sira hanesan protesaun labarik, violénsia hasoru labarik, atividade Diskriminasaun hodi lori asuntu sira-ne’ebé kompreensivu kona-ba protesaun labarik,” nia hateten.
Tanba ne’e, WVTL iha kompromisu atu fó advokasia hodi ajuda foinsa’e sira atu hamenus no evita violénsia no krime hasoru labarik.
To’o ohin loron, WVTL hetan apoiu hosi joven na’in-1000-resin mai hosi klube juventude na’in-40 hosi Maliana, Bobonaro no seluk tan.
Notísia Relevante: PN aprova projetu-lei protesaun ba labarik iha finál globál
Jornalista : Osória Marques
Editór : Cancio Ximenes
