Ministru Interiór no g7+ diskute prevensaun konflitu-promove dame
DILI, 29 jullu 2023 (TATOLI)–Ministru Interiór (MI), Francisco da Costa Guterres, akompañadu hosi Diretór Nasional Prevensaun Konflitu Komunitáriu (DNPKK), António Viegas, simu audiénsia ekipa organizasaun g7+ hodi ko’alia kona-ba prevensaun konflitu liuliu atu promove dame liuhosi atividade diálogu no rekonsiliasaun iha komunidade iha territoriu timor laran tomak.
“Ita hotu hatene katak g7+ hanesan organizasaun Internasionál ne’ebé iha esperiénsia barak, ajuda nasaun barak hodi rezolve sira-nia problema, ho nune’e ita mós husu ajuda hosi sira hodi bele ajuda ita-nia Governu. Entaun, ohin, ami ko’alia ona oinsá atu selebra akordu ida, nune’e bele ajuda Dirasaun Nasionál Prevensaun Konflitu no g7+ prontu hela atu apoiu Ministériu Interiór hodi hahú ho planu boot ida ho edukasaun sivika, prevensaun, mediasaun no halo rezolusaun ba konflitu,” Ministru Interior, Francisco Guterres, hateten liuhosi komunikadu ne’ebé Agência TATOLI asesu, sábadu ne’e.
Parseria servisu ne’e, haree liu ba oinsá atu identifika área sira-ne’ebé atu implementa programa liga ho diálogu, mediasaun no rekonsiliasaun iha komunidade nia le’et.
“Durante ne’e g7+ ajuda ona Diresaun Nasionál Prevensaun Konflitu iha área barak hodi halo mediasaun iha nivel munisipál, suku no aldeia sira liu-liu promove dame entre komunidade inklui rezolve konfrontu entre Grupu Arte Marsiál iha munisipiu sira. Tanba ne’e, Ministériu Interiór kontinua servisu hamutuk hodi fortalese kooperasaun ne’e ho di’ak liutan,” nia dehan.
Tanba ne’e, Ministériu Interiór husu atu selebra akordu ho g7+ atu servisu hamutuk iha área edukasaun sivika tanba g7+ iha rekursu ne’ebé potensiál.
“Ita mos husu atu selebra akordu ida liu hosi Memerandu Entendimentu (sigla inglés; MoU) entre g7+ ho Ministériu Interior, hodi haree área mais importante liu-liu edukasaun sivika tanba g7+ iha rekursu ne’ebé potensia tebes. Entaun ita sei prepara kestaun sira atu dezeña oinsá halo edukasaun sivika ba populasaun no komunidade liuliu joven sira, nune’e muda sira-nia mentalidade hodi partisipa iha dezenvolvimentu nasionál ne’ebe oras ne’e la’o daudaun,” nia hateten.
Govenante ne’e elojia ho parseria servisu ne’ebé antes ne’e la’o ona no nia iha esperansa katak ho akordu ne’ebé sei halo bele buka solusaun ba komunidade nia problema no halo diálogu hodi promove dame iha territóriu nasionál.
Sekretáriu Jerál g7+, Helder da Costa, kongratula Ministru Interiór ba pasta foun no fó-hatene katak prioridade hosi g7+ mak atu muda hosi frajilidade ba reziliénsia, ne’ebé tuir vizaun sira-nian ne’ebé iha.
“Kna’ar prinsipál hosi g7+ mak atu promove dame iha rai-laran. Entaun, ohin, ami mós halo diskusaun produtivu sei iha inisiativa promove prevensaun konflitu nomós rezolusaun konflitu ba iha médiu prazu no longu prazu, tanba ofisialmente g7+ nia kna’ar mak promove pás no dezenvolvimentu iha rai-laran nomós partilla esperiénsia susesu sira ba rai ida-ne’e,” nia dehan.
Tuir nia, g7+ sai nu’udar espasu priviléjiu ida ba Timor-Leste atu kontribui ba pás liuhosi fahe esperiénsia kona-ba seguransa no defeza, tanba ne’e nia propoin atu organiza atividade konjunta ida ho nasaun membru g7+ sira seluk ho liga ba prevensaun nian.
“Ita mós hetan fiar hosi Primeiru-Ministru atu hodi halo kooperasaun servisu ida-ne’e hodi tun ba baze, halo mediasaun, advokasia, disemina informasaun ho ita-nia jovem sira, nune hodi inspira nafatin jovem sira, nune’e muda sira-nia mentalidade atu labele envolve aan iha violénsia” nia hateten.
Jornalista : Hortencio Sanchez
Editór : Cancio Ximenes
