Vise-Ministru Saúde observa servisu laboratóriu nasionál saúde
DILI, 29 jullu 2023 (TATOLI)—Vise-Ministru Saúde ba Operasionalizasaun Ospitál (VMSOO), Flávio Brandão Mendes de Araújo, sesta ne’e, observa laboratóriu nasionál iha Hospital Nasionál Guido Valadares (HNGV), Dili.
Notísia Relevante: Laboratóriu Nasionál Saúde preparadu responde ba moras infesaun
Laboratóriu nasionál nu’udar parte ida hosi Institutu Nasionál Saúde Públika (INSP-TL) ne’ebé halo nia papel importante atu apoiu sistema ida-ne’ebé di’ak ba iha servisu atendimentu públiku.
“Laboratóriu sei transforma hanesan sentru ida-ne’ebé la’ós de’it akomoda atende iha HNGV maibé mós servisu sientífiku sira. Laboratóriu mós bele garante saúde públiku ba ita-nia sidadaun hanesan mós ba konsumu públiku nian hanesan hahán no bee-moos. Ida-ne’e papel boot tebes ne’ebé mak laboratóriu nasionál sei halo no ba oin laboratóriu mós sai hanesan sentru informasaun ida-ne’ebé importante tebes ba ita nia nasaun kona-bá saúde epidemilójia nian,” Vise-Ministru ne’e hateten liuhosi komunikadu ne’ebé Agência TATOLI asesu, sábadu ne’e.
Iha vizita ne’e hala’o mós enkontru ho Prezidensiál INSP-TL ho estrutura tomka, oinsá bele armoniza no rasionaliza servisu sira atu ba oin bele iha mudansa.
“Oinsá haree ba sira nia regulamentu internál hodi dezenvolve atu moderniza laboratóriu, nune’e bele responde nesesidade ida-ne’ebé mak agora povu no nasaun enfrenta. Papel laboratóriu tenke sai ona hosi rutinidade ne’ebé mak durante tempu naruk ita halo no laboratóriu nasionál tenke transforma ba sentru ida exelente,” nia dehan.
Laboratóriu refere hanesan fatin ida-ne’ebé sei tau matan ba laboratóriu sira seluk iha teritóriu tomak no ba ospitál rejionál sira, sentru saúde sira, nune’e mós setor privadu sira-ne’ebé mak halo nia prátika no hola papel importante oinsá asegura kualidade iha setór privadu sira-ne’ebé mak la’o hela iha rai-laran.
Notísia Relevante: Laboratóriu Nasionál Saúde prevee $823,345 iha OJE 2022
Jornalista : Hortencio Sanchez
Editór : Cancio Ximenes
