DILI, 01 agostu 2023 (TATOLI)—Komandante PNTL Munisípiu Díli, Superientendente Xefe Polísia Orlando Gomes, hateten PNTL munisípiu Dili buka solusaun ba negosiante faan karreta no motorizada iha dalan públiku sira iha kapitál Dili.
Notísia Relevante:PNTL la tolera motorista para viatura iha arredor Palasiu Governu-PN
“Sira faan karreta ho motorizada iha dalan públiku ne’e mós halo engarafamentu ba movimentu transporte sira. Ida-ne’e ha’u sei orienta ha’u-nia membru hodi observa hodi ita haree no buka nia solusaun,” Superientendente Xefe Polísia ne’e hateten ba Agência Tatoli hafoin ramata programa “Entervista Eskluziva” ho topiku “Servisu Komandu hodi Prevene Krime iha Kapitál”, iha estúdiu Faról, tersa ne’e.
Negosiante sira-ne’ebé faan karreta ho motorizada tenke iha nia fatin rasik la’ós faan iha dalan públiku no trotoar ba ema la’o ain sira.
“Fatin ne’ebé mak autoriza mak Tasi-Tolu no Caicoli, maibé dala ruma fatin ne’ebé la autoriza sira mai para no hodi faan, ida-ne’e ita sei tau atensaun. Ba oin, ami sei haree asuntu ida-ne’e, nne’e evita hamosu engarafamentu iha Dili laran,” nia dehan.
Nia parte sei orienta ekipa ida hodi observa no identfika fatin ne’ebé mak sira hodi utiliza ba faan karreta no motorizada, hafoin buka nia solusaun no sansaun sira.
“Ami sei halo asaun hasoru sira kuandu ami identifika ona. Ita sei haree kódigu estrada nian maki ta sei fó sansaun ba sira. Maibé, aban, ami sei halo enkontru ida ho Prezidente Autoridade Munisipál Dil (AMD) haree asuntu ida-ne’e,” nia hateten.
Husu kona-ba identifikasaun fatin própriu ba negosiante karreta ho motór, nia dehan, sei halo liña koordenasaun ho AMD no ho Terra Propriedade, njune’e sira mak bele identifika fatin.
“Ita tenke organiza halo didi’ak ba sidade Dili, tanba ema sé mak hakarak faan karreta ne’e tenke faan iha loza laran la’ós iha estrada públiku no okupa trotoar. Ida-ne’e, ba oin, ita haree maibé presiza halo koordenasaun parte kompeténsia sira,” nia esplika.
Ho asuntu ne’e, nia rekomenda ba negosiante karreta no motorizada sira tenke buka fatin ne’ebé própriu no luan ho livre, ne’ebé labale halo engarrafamentu ba movimentu transporte sira.
Antes ne’e, Sekretáriu Estadu Asuntu Toponímia no Organizasaun Urbana, Germano Santa Brites, hateten kona-ba abitante faan karreta ho motór iha dalan públiku sira, Sekretáriu Estadu Toponímia no Organizsuan Urbana husu atu iha fatin propria mak faan.
“Estadu hanoin hela hodi buka prepara fatin maibé maluk ne’ebé mak faan karreta dahuluk kompañia faan karreta ho motorizada tenke iha fatin mesak no tenke iha armajen. Bainhira karreta mai hatama tiha lai mak lori sai ba faan. Ba sira-ne’ebé mak sei faan iha dalan públiku no trotoar sira-ne’e, husu na’in tenke kompreende fatin faan nian. Mibé, kaundu avizu demais mak la kumpre munisípiu Dili iha fatin di’ak ruma bele ajuda sira,” nia dehan.
Bazeia ba dekretu-lei númeru 33/2008, artigu 5 to’o artigu 9 ne’e hateten katak karik balun mak kontra ordenamentu iha kapitál Dili, mak AMD iha kompeténsia atu fó hatene ba sira hodi labele okupa espasu públiku sira.
Notísia Relevante: Polisia tenke kontrola sidadaun faan karreta iha dalan públiku
Jornalista : Osória Marques
Editór : Cancio Ximenes
