DILI, 07 agostu 2023 (TATOLI)—Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten defisil buka-tuir erói sira-nia ruin liuliu Saudozu Nicolau Lobato nia ruin tanba to’o agora seidauk hetan.
Notísia Relevante: Deputadu PN husu IX Governu buka-tuir Nicolau Lobato nia ruin
“Ita lahetan sira-nia ruin, sira-nia naran tenke hakerek iha fatin ne’ebé mak Estadu prepara ho nune’e it abele hatene. Ita lalika ko’alia ema mate tinan 1975 nian ita buka de’it tinan 1999 la hetan hotu, ida-ne’e susar no todan tebes ba ita. Entaun, ita timoroan hamutuk no polítika sira mai hodi halo polítika valorizasaun di’ak ida ba sira hodi prega, nune’e ita kontenese ba sira,” Oan Soru hateten ba jornalista sira iha nia kna’ar fatin, Caicoli, segunda ne’e.
Oan Soru hatutan, durante ema mate liu rihun 200 ne’e la fasil atu hetan tanba tinan barak ona no balun mota lori tanba udan.
“Ida-ne’e presiza servisu hamutuk nune’e bele buka solusaun hodi valoriza sira. Tanba ne’e, ami ho CCLN de’it. Se labele, maibé presiza timoroan hotu liuliu ba sira-ne’ebé iha koñesimentu kona-ba asuntu ne’e hodi bele fó kontribuisaun. Tanba, kontribuisaun ho nia valór ne’ebé boot ne’ebé aas liu ba Timor-Leste ba indenpendénsia lori ema ba mate,” nia hateten.
Notísia Relevante: Horta: “Tempu ruma sei rezolve saudozu Nicolau Lobato nia restu mortál”
Jornalista : Osória Marques
Editór : Cancio Ximenes
