DILI, 10 agostu 2023 (TATOLI)—Governu liuhosi reuniaun Konsellu Ministru (KM) estraordináriu, kinta ne’e, aprova projetu dekretu-lei, ne’ebé aprezenta hosi Ministru Prezidénsia Konsellu Ministru, Agio Pereira, kona-ba pagamentu suplementár ba funsionáriu, ajente no kontratadu ho termu sertu iha Imprensa Nasionál Timor-Leste, Institutu Públiku (INTL, I.P).
Pesoál hirak ne’e halo serbisu impresaun boletin votu ba Eleisaun Parlamentár iha loron 21 maiu 2023.
“Pagamentu suplementár ida-ne’e ho objetivu atu fó prémiu ba traballadór sira ne’ebé serbisu durante prosesu impresaun boletin votu no fó kompensasaun ba sira ho kondisaun espesiál tanba limita sira-nia liberdade pesoál ho serbisu todan,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : INTL hahú prodús buletin votu ba Eleisaun Parlamentár
Direitu ba pagamentu suplementár ba de’it funsionáriu, ajente no kontratadu INTL, I.P ne’ebé serbisu durante prosesu impresaun boletin votu no iha rejime serbisu permanente, tuir turnu, durante oras 24 loroloron no laiha interrupsaun durante períodu durasaun ba serbisu ne’e.
Jornalista : Antónia Gusmão
Editora : Julia Chatarina
