Abertura Jogu Sub Livre iha FC Cruz manán Salamot
MALIANA, 12 agostu 2023 (TATOLI) – Klube FC Cruz iha sesta ne’e manán nia adversáriu Salamot ho rezultadu 2-0 iha albertura jogu Sub Livre Taxa Rotativa Asosisaun Futeból époka 2023.
Prezidente Asosiasaun Futeból Bobonaro, Domingos Gouveia Moniz, hateten eventu ne’e realiza atu buka fini foun, tanba ne’e asosiasaun fó oportunidade ba klube hotu atu rekruta jogadór liga nasionál sira atu jogadór foun sira bele halo adaptasaun ho sénior sira.
Notísia Relevante:Klube 14 rejista iha AFB atu kompete jogu sub-livre
“Klube 21 ne’ebé hola iha taxa rotativa ida ne’e, tenke hatudu nafatin disiplina joga, esportiva ne’ebé di’ak hatudu imi-nia skill ne’ebé di’ak liu atu nune’e ita-nia adeptu sira mós bele konta ita iha fatin ne’ebé de’it”, nia hato’o apelu ne’e iha estádiu Malibaka Yamato Mañana.
Sorín seluk, Sekretáriu Autoridade Munisípiu Bobonaro, Joao de Fátima do Carmo, agradese no apresia ba asosiasaun ne’ebé iha inisiativa loke eventu ne’e.
João subliña autoridade munisípiu hamutuk ho autoridade defeza no seguransa kontinu apoia no koopera ba jogu hodi fó susesu ba eventu ne’e..
“Ami autoridade munisípiu nia haree, eventu ne’e bele promove juventude sira-nia talentu liuhosi futeból no bele promove ita-nia saúde ne’ebé di’ak liután”, nia katak.
Biban ne’e, Adjuntu Prezidente Autoridade Munisípiu ne’e enkoraja jogadór sira iha klube 21 atu hatudu kapasidade jogu no simu rezultadu manán ou lakon.
“Ida ne’ebé mak manán ita rekoñese no se mak manán ou lakon mós, ita Bobonaro mak manán ida ne’e mak importante tanba Governu fó ona oportunidade atu halo atividade desportu barak ne’ebé labele kria violénsia atu Bobonaro nia naran bele morin ba bebeik”, tuir nia.
Notísia Relevante:AFB rejista klubu 12 atu kompete iha TELKOMCEL Cup sub-17
Nornalista: Sergio da Cruz
Editor: Zezito Silva
