COVALIMA, 15 agostu 2023 (TATOLI)–Diretór Servisu Munisipal Agrikultura Covalima, Reinaldo Moniz Coli, hateten daudaun ne’e Servisu Munisipal Agrikultura Covalima (SMAC) laiha estoke fini modo atu distribui ba agrikultór sira.
“Ita laiha estoke fini modo atu distribui ba agrikultór sira hodi halo produsaun modo. Fini modo la’ós iha munisípiu de’it mak laiha estoke maibé iha nasionál mós estoke laiha, nune’e hosi munisípiu labele halo buat ida,” Reinaldo Moniz Coli hateten ba Agência Tatoli, iha AMC, Sukaer Laran, tersa ne’e.
Nia hateten, maske hato’o ona pedidu ba nasionál atu resolve problema ida-ne’e maibé to’o ohin loron laiha rezultadu.
“Ita submete ona proposta maibé hosi Dirasaun Nasionál to’o ohin loron seidauk iha estoke fini modo tanba kompañia ne’ebé atu sosa fini modo ne’e seidauk hatama fini mai Timor-Leste,” nia hateten.
Bazeia ba kalendáriu loloos finaliza ona halo distribuisaun fini modo ba agrikultór sira, maibé agora daudaun kalendáriu liu ona atu distribui fini modo ba agorikultór sira.
“Ita hatene kalendáriu atu kuda modo hahú iha fulan-jullu no agora tama ona fulan-agostu, ita iha ona produsaun ba modo, tanba de’it estoke fini modo iha nasionál laiha. Entaun, iha munisípiu labele halo buat-ida,” nia dehan.
Munisípiu Covalima iha área ne’ebé potensiál ba agrikultura mak hanesan área hortikultura produsaun hare kuilt, batar, fore-mungu, fore-rai, fore-keli, koto, pateka no seluk tan.
Jornalista : Celestina Teles
Editór : Cancio Ximenes
