OÉ-CUSSE 21 agostu 2023 (TATOLI – Diretór Programa Nasionál Dezenvolvimentu Suku (PNDS), Rejiaun Administrativa Espesiál Oé-Cusse Ambeno (RAEOA), Tomas Boquifai, informa, projetu Reabilitasaun Sede Suku (RSS) iha sub-rejiaun Pássabe no Nítibe kuaze konklui ona tanba progresu fiziku balu to’o ona 97%.
“Unidade ida ita inaugura ona iha suku Bene-Ufe Nítibe, hela unidade neen, maibé nia progresu ein-jerálmente kuaze konklui ona, balu 97% ona tanba hela servisu kompleta nian de’it, ba servisu fiziku kuaze hotu ona,” Tomas Boquifai ko’lia iha Oé-Cusse, segunda ne’e.
Notísia relevante: PNDS RAEOA sei reabilita sede suku hitu iha Pássabe-Nítibe
Nia informa, rehabilitasaun RSS ne’e implement aba sub-rejiaun Pássabe no Nítibe, tanba RSS primeiru implementa iha Pante Makasar ba suku ualu, iha 2021 implementa iha sub-rejiaun Oésilo maibé responsabiliza másima hosi Autoridade,
“Tinan ne’e PNDS mak implementa ba suku hitu iha Pássabe suku rua iha Nítibe iha suku lima, ho nia orsamentu kada RSS iha rihun $17, nia fundu operasionál laiha, tanba ne’e implementa direta hosi Ekipa Jestaun Suku,” nia katak.
Nia informa, hosi orsamentu ne’e, suku sira mak deside hodi aloka ba selu badaen, orsamentu ba operasionál, no restu sosa materiál hanesan keramik, troka kalén, plafon, odamatan, pinta no hadi’a resintu sede suku nian.
Jornalista: Abílio Elo Nini
Editor: Evaristo Soares Martins
