DILI, 22 agostu 2023 (TATOLI)-Parlamentu Nasionál (PN), tersa ne’e hahu hala’o debate ho Governu ba proposta lei Orsamentu Retifikativu (OR) 2023 iha faze jeneralidade.
Notísia Relevante: Debate proposta OR 2023 muda fali ba 22 agostu
Tuir ajenda ne’ebé Agência Tatoli asesu hosi PN ohin katak, diskusaun no votasaun iha jeneralidade ba pakote lei tolu hamutuk ho karatér urjénsia hanesan proposta lei númeru 1/VI(1a)-alterasaun dahuluk lei númeru 15/2022, 21 dezembru, Orsamentu Jerál Estadu (OJE) ba 2023, no lei númeru 2/2022, 10 fevereiru, Enkuadramentu Orsamentál Jerál Estadu no Jestaun Finansa Públika no alterasaun daruak lei númeru 8/2008, 30 juñu, lei Tributária.
Ba debate jeneralidade ne’e sei hala’o durante loron ida ho nia giaun mak Primeiru-Ministru sei aprezenta proposta-lei, hafoin sei aprezenta relatóriu paresér hosi komisaun C trata asuntu Finansa Públika, no tuir mai intervensaun hosi bankada parlamentár no resposta hosi parte Governu.
Hafoin debate konklui, PN sei hala’o votasaun ba proposta-lei OR 2023 iha jeneralidade.
Tuir Rejimentu Parlamentu Nasionál (RPN) iha sesaun III diskusaun no votasaun iha jeneralidade iha plenáriu artigu 105 (Inísiu diskusaun alínea 1 hateten diskusaun iha jeneralidade foka ba prinsípiu no sistema projeitu ka proposta-lei ida-idak nian.
Tuir kalendáriu, PN hala’o debate espesialidade sei hala’o iha 23-24 agostu, no votasaun finál globál, iha debate espesialidade sei hala’o debate espesífiku ba kada artigu ba proposta-lei.
Proposta OR ne’ebé aprezenta ho montante biliaun $1,7 ne’e ho karáter urjénsia tuir planu no nesesidade ne’ebé Governu define.
Jornalista : Nelson de Sousa
Editór : Cancio Ximenes
