Komemora konsulta populár hanoin hikas pasadu povu fakar raan no mate
DILI, 29 agostu 2023 (TATOLI)—Ministru Administrasaun Estatál (MAE), Tomás do Rosário Cabral, hateten komemorasaun loron konsulta populár ba dala-24 (30 agostu 1999-30 agostu 2023) ne’e fó hanoin ba ema hotu katak hanoin hikas pasadu ne’ebé povu fó han mate no fakar ran.
Notísia Relevante: Konsulta populár timoroan brani ba ezerse votu
“Atividade komemorasaun ba loron 30 agostu ne’e, ita fó sai tiha ona ba autoridade hotu-hotu. Tanba, komemorasaun ne’e atu fó hanoin hikas mai ita ba situasaun hirak ba kotuk maibé importante mak ne’e, ita bele komemora maibé ita laiha pás ho estabilidade komemorasaun laiha valór, ita presiza pás ho estabilidade mak sidade tenke moos,” Tomás Cabral hateten ba jornalista sira, iha edifísiu MAE Caicoli, segunda ne’e.
Governante ne’e hatutan, bainhira iha pás ho estabilidade mak tenke sidade moos, ne’e importante ba ema hotu-hotu, tanba ne’e Governu hili tema sentrál “Limpeza ita-nia sidade rasik”.
Nia hateten, objetivu hili tema “Limpeza iha sidade” ne’e tanba populasaun sira hela iha Dili liu ema rihun 300.
“Ita hili tema limpeza ita-nia sidade ba loron konsulta populár tanba Dili ita mai ho ema rihun 300 resin hosi ema millaun resin. Tanba ne’e, ita presiza halo sensibilizasaun ba komunidade atu oinsá moris iha sidade ida,” Tomás Cabral hateten.
Liga ho ambiente moos, MAE dehan nia mós hasoru malu ho parte Parókia Balide halo hela programa integradu ekolójia no eukaristia liu-liu promove kona-ba konseitu moos iha parókia ba to’o suku sira, hodi mak partilla hamutuk oinsá hosi parte igreja bele servisu hamutuk ho Governu.
Jardin eukolójia ne’e hanesan fatin ba divertimentu, formasaun no enkontru entre joven sira no komunidade no tinan ne’e avansa ho konseitu Balide moos, iha tinan oin ho konseitu Balide matak.
Kona-ba konseitu moos, Parókia Balide harii ona jardin eukolójia la’ós de’it harii iha parókia, maibé tuir planu sei harii jardin ekolíjia iha suku lima ne’ebé pertense ba Parókia Balide, hanesan suku Mascarenhas, Santa Cruz, Bemori, Lahane Osidentál no Lahane Orientál.
Jornalista : Osória Marques
Editór : Cancio Ximenes
