Konsulta populár timoroan brani ba ezerse votu
DILI, 29 agostu 2023 (TATOLI)—Deputada hosi Bankada CNRT iha Parlamentu Nasionál (PN), Cedelizia dos Santos, hateten importante tebes ba komemorasaun loron konsulta populár ba dala-24(30 agostu 1999-30 agostu 2023), ne’ebé timoroan sira brani hodi hakat ba ezerse votu ba autodeterminasaun mezmu hasoru intimidasaun oioin hosi okupasaun ilegál militár Indonézia.
Notísia Relevante: Rezultadu konsulta populár deside povu nia hakarak ba ukun rasik an
“Hanesan loron ida-ne’ebé mak importante tebes bainhira iha tinan 24 liu ba, ita hotu ho brani tebes ba ezerse ita nia papél hodi vota ba iha ita-nia ukun rasik aan. Nune’e, hato’o parabéns ba povu Timor-Leste,” nia hateten liuhosi reuniaun plenária PN, tersa ne’e.
Nia husu atu loron istóriku ne’e hanesan papel ida mós tenke fó hanoin beibeik ba juventude sira hodi hatene istória.
Deputada FRETILIN, Lidia Norberta, hakarak hato’o parabens ba povu Timor-Leste iha komemorasaun loron konsulta populár ba tinan ne’e, tanba konsulta populár mak ita konsege duni moris ho ukun rasik aan.
Iha ámbitu komemorasaun ne’e husu populasaun sira atu hamutuk kontribui nafatin ba Timor-Leste nia dezenvolvimentu nasaun.
Notísia Relevante: Hanoin hikas “Akordu 5 de Maio 1999”
Jornalista : Nelson de Sousa
Editór : Cancio Ximenes
