Konsellu Ministru aprova tan orgánika ministériu sia

DILI, 29 agostu 2023 (TATOLI)—Reuniaun Konsellu Ministru aprova ona orgánika Ministériu sia, kompostu hosi Ministériu Edukasaun, Ministériu Ensinu Superiór, Siénsia no Kultura, Ministériu Transporte no Komunikasaun, Ministériu Komérsiu no Indústria, Ministériu Dezenvolvimentu Rurál no Abitasaun Komunitária, Ministériu Interiór, Ministériu Juventude, Desportu, Arte no Kultura, Ministériu Planeamentu no Investimentu Estratéjiku, no Ministériu Finansa.

“Ministériu Edukasaun maka departamentu governamentál ne’ebé responsável ba konsesaun, ezekusaun koordenasaun no avaliasaun ba polítika ne’ebé define no aprova ona hosi Konsellu Ministru, iha área ensinu no kualifikasaun ba nível ensinu hotu-hotu, la inklui nível superiór, konsolida no promove lian ofisiál sira,” refere nota ne’ebé Agência Tatoli asesu, tersa ne’e.

Ministériu Ensinu Superiór, Siénsia no Kultura maka departamentu governamentál ne’ebé responsável ba konsesaun, ezekusaun, koordenasaun no avaliasaun ba polítika, define no aprova ona hosi Konsellu Ministru, ba área ensinu no kualifikasaun nível superiór, nune’e mós ba área siénsia no teknolojia nian.

Notísia relevante : Konsellu Ministru aprova orgánika ministériu hitu

Enkuantu, Ministériu Transporte no Komunikasaun maka departamentu governamentál ne’ebé responsável ba konsesaun, ezekusaun no koordenasaun no avalisaun ba polítika ne’ebé define no aprova ona hosi Konsellu Ministru ba área transporte no Komunikasaun.

Ministériu Komérsiu no Indústria maka departamentu governamentál ne’ebé responsável ba konsesaun, ezekusaun, koordenasaun no avaliasaun ba polítika sira ne’ebé define ona hosi Konsellu Ministru ba área atividade ekonómika, komersiál no industriál.

Ministériu Dezenvolvimentu Rurál no Abitasaun Komunitária maka departamentu governamentál ne’ebé responsaável ba konsesaun, ezekusaun, koordenasaun no avaliasaun ba polítika sira ne’ebé define no aprova ona hosi Konsellu Ministru ba área sira ne’ebé iha ligasaun ho melloria kondisaun moris, oportunidade no asesu ba zona rurál sira, dezenvolve inisiativa hodi promove diversifikasaun atividade, kriasaun empregu iha fatin rurál, ho objetivu atu konsolida ninia estrutura produtiva.

Ministériu Interiór maka departamentu governamentál ne’ebé responsável ba konsesaun, ezekusaun, koordenasaun no avaliasaun ba polítika sira ne’ebé define no aprova ona hosi Konsellu Ministru, iha área seguransa interna, migrasaun no azilu, kontrolu fronteira, protesaun sivíl, seguransa rodoviária no kooperasaun polisiál.

Ministériu Juventude, Desportu, Arte no Kultura maka departamentu governamentál ne’ebé responsável ba konsesaun, ezekusaun, koordenasaun no avaliasaun ba polítika, ne’ebé define no aprova ona hosi Konsellu Ministru, iha área juventude, desportu, arte no kultura nian.

Ministériu Planeamentu no Investimentu Estratéjiku maka departamentu governamentál ne’ebé responsável ba konsesaun, koordenasaun no avaliasaun ba polítika, ne’ebé define no aprova ona hosi Konsellu Ministru, ba área promosaun dezenvolvimentu ekonómiku no sosiál país, liuhosi planeamentu estratéjiku no integradu no rasionalizasaun rekursu finanseiru disponível, hodi asume responsabilidade espesífika sira kona-ba implementasaun Planu Estratéjiku Dezenvolvimentu nian.

Ministériu Finansa nu’udar departamentu governamentál ne’ebé responsável ba konsesaun, ezekusaun, koordenasaun no avaliasaun ba polítika ne’ebé Konsellu Ministru define no aprova ona, ba área planeamentu, monitorizasaun no avaliasaun anuál Orsamentu Jerál Estadu no finansa públika nian.

Jornalista     : Antónia Gusmão

Editora          : Julia Chatarina