iklan

DILI

Estadu lakon osan konstrui merkadu Manleuana maibé negosiante la utiliza

Estadu lakon osan konstrui merkadu Manleuana maibé negosiante la utiliza

Situasaun atuál iha Merkadu Manleuana, Dili, sesta (23/12/2022). Imajen Tatoli/Francisco Sony

DILI 30 agostu 2023 (TATOLI)—Ministru Administrasaun Estatál (MAE), Tomás do Rosário Cabral, hateten, Estadu Timor-Leste lakon osan barak konstrui merkadu Manleuana maibé negosiante sira la utiliza hodi halo atividade faan no ssoa sasán.

Notísia Relevante: MAE: Autoridade Dili-Liquiça sobu baraka iha Tibar ho baze Dekretu-Lei Nú 33/2016

“Ita-nia Estadu lakon osan lubuk ona maibé ema lakohi uza hodi faan iha ne’ebá. Ita haree fatin merkadu ne’e sei bele akumula ema no sira mak ho razaun dehan ema la ba sosa,” Governante ne’e hateten ba jornalista sira, iha salaun Delta Nova, kinta ne’e.

Nia hateten, komunidade buka razaun de’it maibé ida-ne’e sei Governu sei kria orden nune’e lori sira tama ba merkadu tanba se lae negosiante sira-ne’e halo sidade Dili la organizadu.

“Governu lakon osan barak ba ne’ebá. Ne’ebé mídia mós tenke kontribui informasaun ba públiku tanba sidade ne’e ita-nia,” nia hateten.

Kona-ba Merkadu Becora, nia informa ona ba autoridade munisípiu atu sobu ne’ebá maibé dehan uma permanente entaun seidauk sobu.

“Ita agora la’ós hanoin de’it merkadu Becora maibé ita hanoin atu lori populasaun ba li’ur mak iha Hera ne’e,” nia hateten.

Prezidente Autoridade Munisípiu Dili (AMD), Guilhermina Filomena Saldanha, hateten iha dekretu-lei númeru 33/2008 ne’e hateten kontra ordensaun públiku, entaun kuandu la kumpre regra mak sei aplika koima mínimu $5 no másimu $500.

“Se ami aplika koima mak sei iha tan problema, entaun ami husu kooperasaun atu kontribui ba sidade organizadu. Maibé, kuandu la kumpre no ami identifika dala rua tolu ba leten mak ami sei aplika koima. Munisipiu Dili, kapitál nasaun nian mak AMD iha obrigasaun no dever atu organiza Dili sai moos no matak,” nia dehan.

Nia hateten, fasilidade ne’ebé Governu prepara ona iha merkadu Taibesi no Manleuana ne’e agora la uza, nune’e fó ona tempu temporária maibé sira mós tenke hahú ona atu koopera ho autoridade munisipiu Dili.

Nune’e, husu ba komunidade tenke halo separasaun merkadu ho espasu públiku, nune’e Dili ne’e haree organizadu no furak.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!