DILI, 07 setembru 2023 (TATOLI)— Sekretária Estadu ba Igualdade (SEI), oferese formasaun kona-ba “kontrola hahalok hirus” ba prizoneiru na’in-35 iha prizaun Becora.
Formasaun durante loron lima, hahú hosi Segunda (04/09) to’o sesta (08/09) ne’e ho objetivu atu muda mentalidade prizoneiru sira bainhira integra aan fali ba sosiedade.
“Ita boot sira iha ne’e tanba kontra lei no kumpre desizaun ne’ebé maka vigora. Maibé ha’u fiar ita boot sira sai hosi ne’e sei sai sidadaun ne’ebé ativu no kontribui ba prosesu dezenvolvimentu”, Sekretáriu Estadu ba Igualdade (SEI), Elvina de Sousa Carvalho, hateten liuhosi nota ne’ebé Agéncia TATOLI asesu, kinta ne’e.
Tanba, nia dehan prizoneiru sira iha estabelesimentu prizionál munisípiu Dili tuir hela formasaun iha área karpintária, pedreiru, lían Portugés no Iglesh inklui komputadór.
Programa formasaun sira ne’e hahú husi IV Governu Konstitusionál no kontinua to’o governasaun ida-ne’e.
” Governu la haluha no kontinua tau matan ba ita boot sira, nune’e uza oportunidade liuliu formasaun sira ne’e hodi hariku konesimentu bainhira fila ba sosiedade bele kontribui ba prosesu dezenvolvimentu”, nia afirma.
Iha biban hanesan, Diretór Nasionál Servisu Prizionál no Reinzersaun Sosiál iha Ministériu Justisa, Delfio Alves, hato’o agradesimentu no husu ba prizioneiru sira atu partisipa formasaun ho sériu hodi kontrola emosaun.
“Governu fó formasaun ne’e hodi fó hanoin mai ita atu uza konsénsia nu’udar umanu hodi respeita ema atubele aprende buat di’ak no positive, nune’e ita boot sira bele prepara aan bainhira fila ba komunidade no família bele lori hela bukae ida hodi kontrola nafatin hirus. Atu labele hanoin fila mai iha fatin ida-ne’e,” nia enkoraja.
Notísia relevante: Formasaun kona-ba “Kontrolu Hahalok Hirus” atu muda prizoneiru sira-nia mentalidade
Jornalista: Osória Marques
Editór : Florencio Miranda Ximenes
