Agrikultura Oé-Cusse konserva bee-matan Oél-Polo iha Taiboko hamosu debu naturál
OÉ-CUSSE, 13 setembru 2023 (TATOLI – Sekretariu Rejionál ba Asuntu Agrikultura, liuhosi Departamentu Floresta no Konservasaun, kuarta ne’e konserva bee-matan Oél-Polo iha bairru Bilite, aldeia Nemun, suku Taiboko, sub-rejiaun Pante Makasar, hodi hamosu debu naturál prepara ba tempu bailoron bele fornese bee ba uma-kain 70.
Notísia relevante: Lia-na’in Taiboko realiza serimónia rituál proteje bee-matan Ulas
Sekretáriu Rejionál ba Asuntu Agrikultura, José Eta, informa, planu ba koservasaun bee-matan ne’e diresaun agrikultura ajenda kedas iha Planu Asaun Anuál (PAA) hodi konserva no halo debu naturál tolu iha iha tinan 2023 ne’e.
“Ita hamutuk ho UNDP ita halo monitorizasaun ba konservasaun bee matan ne’e, atu kria debu naturál tolu iha bee-matan Oél-Polo ne’e, tanba bee-matan ne’e eziste nanis ona, entaun ita bele moderniza halo di’ak liután atu fó bee ba komunidade sira, liuliu iha bairru Bilite ne’e, tanba iha uma-kain 70 maka hela besik bee-matan sira-ne’e,” José Eta, ba Tatoli iha Oé-Cusse, kinta ne’e.
Objetivu hosi konservasaun ba bee-matan sira atu kria debu naturál, tanba bee-matan ne’e ho medida hamutuk 23 X 8,5, volume boot no luan, entaun fasil bele kria debu naturál.
“Ita hakarak halo debu naturál tolu, ida-ne’e nia funsaun to’o tempu udan bele infiltra bee hodi aumenta volume bee ita bee-matan ne’e rasik, nune’e komunidade sira bele asesu tantu bailoron no tempu udan, tanba durante ne’e bee-matan Oél-Polo rasik, fornese ona bee ba benefisiáriu uma-kain 70, entaun sei debu boot ida no kada tinan konserva reflorestasaun iha bee-matan ida-ne’e, ita bele garante nia kualidade ba tempu naruk,” nia katak.
Notísia relevante:Autoridade RAEOA identifika bee-matan Oél-Ulas dada bee ba uma kain 126
Jornalista : Abílio Elo Nini
Editór : Evaristo Soares Martins
