iklan

INTERNASIONÁL

Lian Tetun tatoli iha laloran ‘Salaam Radio’ Reino Unido

Lian Tetun tatoli iha laloran ‘Salaam Radio’ Reino Unido

Celso Oliveira no Clara Jeronimo nu’udar membru ezekutivu komunidade Timoroan iha sidade Peterborough lori programa rádiu ho naran “Kalan kmanek ba Timoroan iha Reino Unido”.

REINO UNIDO, 15 setembru 2023 (TATOLI) – Lian Tetun, lian povu timoroan sira nian, tatoli no haklaken iha laloran-anin ‘Salaam Radio’ ho frekuénsia 106.2FM, iha Reino Unido.

Lian Tetun tatoli liuhusi programa rádiu ho naran “Kalan kmanek ba Timoroan iha Reino Unido”, ho objetivu atu fahe informasaun ba komunidade Timoroan iha Reino Unido.

“Ha’u hanoin ida ne’e primeiravez programa foun no di’ak tebes atu fahe informasaun lais no direta ba Timoroan hotu iha Reino Unido. Ha’u hahú programa ne’e iha loron Kuarta 30 agostu 2023 bainhira Timor-Leste komemora tinan 24 loron referendum,” Timoroan iha Reino Unido, Celso Oliveira, hateten, tuir komunikadu ida, ba TATOLI, ohin.

Celso sente orgullu nu’udar timoroan tanba tuir nia iha faze foun uza rádiu ne’e atu apoiu no halo koneksaun nafatin ho Timoroan sira iha Reino Unido. Objetivu prinsipal mak atu fahe informasaun los no direta ba komunidadi sira.

Nune’e mós, timoroan ida, Clara Jeronimo, espresa nia sentimentu.

“Ha’u sente, ho dalan ida ne’e step by step ita tama ona iha step (pasu) ida katak ita bele uza rádiu i ita bele ko’alia diretamente ba maluk Timoroan sira iha ne’ebé de’it sira bele rona informasaun ruma ne’ebé ita fahe i bele ajuda sira. Keta haluha sintoniza no akompaña nafatin live (transmisaun direta), kuarta feira, Rádio Salaam programa Kalan Kmanek ba Timoroan ho tópiku oi-oin”, Clara Jeronimo dehan.

Ho ezisténsia programa lian Tetun, Pezidente Repúblika José Ramos Horta, liuhusi nia rede sosiál; Facebook, hato’o felisitasaun ba inisiativa ne’e bo hakerek: “Parabéns, atividade ida ne’e pozitivu los ba komunidade iha UK”.

Enkuantu, Embaxadór Timor-Leste iha Reino Unido, João Paulo Rangel, hakerek iha embaixada ninia Pájina Facebook hatudu ninia apresiasaun no apoiu.

“Embaixada apresia no apoia inisiativa hotu-hotu ne’ebé komunidade Timorenses halo hodi promove ita-nia nasaun RDTL. Parabéns ba lokutór rádiu no’o Maun-Alin-Inan-Feton sira hotu ne’ebé hela iha Cidade de Peterborough”.

Entretantu, Salaam Radio ho frekuénsia 106.2 FM situa/baze iha sidade Peterborough, Reino Unido, fó oportunidadi no apoia ba komunidadi hosi rai oi-oin hodi halo transmisaun informasaun no notísia.

Oras ne’e daudaun, komunidadi hosi rai lima hanesan Lithuania, India, Pakistan, Latvia no Timor-Leste mak uza hamutuk Radio Salaam hodi transmiti informasaun, istória no notísia uza rasik sira ninia lian materna. Komunidadi Timor promove lian Tetum durante transmisaun programa rádiu iha loron kuarta, semana ida dala ida, duranti oras ida nia laran hosi tuku 6-7 kalan.

Celso Oliveira no Clara Jeronimo nu’udar membru ezekutivu komunidade Timoroan iha sidade Peterborough lori programa rádiu ho naran “Kalan kmanek ba Timoroan iha Reino Unido”.

 

Tatoli

iklan
iklan

Leave a Reply

iklan
error: Content is protected !!