NASIONÁL

Assanami ho Prezidente KFP diskute forsa traballu ministériu

Assanami ho Prezidente KFP diskute forsa traballu ministériu

Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, dada-lia ho Prezidente Komisaun Funsaun Públiku, Faustino Cardoso Gomes, iha Gabinete VPM, Palásiu Governu, sesta (15/09/2023). Imajen/Mídia GVPM

DILI, 16 setembru 2023 (TATOLI)Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, ho Prezidente Komisaun Funsaun Públika (KFP), Faustino Cardoso Gomes, hamutuk ho ekipa diskute forsa traballu ministériu.

“Objetivu hosi enkontru ne’e atu hodi asenta hamutuk kestaun sira ne’ebé ligadu ho nesesidade ba forsa traballu atu oinsá bele prienxe estrutura orgánika ba ministériu foun ne’e nian hodi bele funsiona normál hodi hala’o mandatu ne’ebé ministériu ne’e iha,” Prezidente KFP hateten hafoin remata sorumutuk ho Vise Primeiru-Ministru Assanami iha Palásiu Governu, iha sesta (15/09).

Notísia relevante : KFP husu PN inísia lejislasaun reforma obrigatória ba funsionáriu públiku

Nia dehan, ministériu ne’e foun, tanba ne’e presiza iha informasaun no klafika atu oinsá mak prienxe estrutura orgánika ho dalan hirak ne’ebé presiza liuhosi destakamentu no dalan seluk mak liuhosi rekrutamentu.

“Hakarak avansa ho destakamentu, maibé la taka dalan para ikus mai ministériu asume responsabilidade ho nia pesoál rasik liuhosi dalan rekrutamentu,” Faustino akresenta.

KFP mós ko’alia kona-ba kestaun oinsá mak ministériu foun ne’e iha lalais órganika no diploma ministeriál sira atu sai baze ba KFP bainhira simu proposta nomeasaun sira hodi asegura legalidade tantu ba funsionáriu no iha diresaun kargu xefia sira.

“Ida seluk tan mak oinsá iha kuadru pesoál ida ne’ebé adekuadu, katak presiza iha kuadru pesoál ida mak hala’o bazeia ba nesesidade mandatu ho analiza ne’ebé kle’an atu hodi asegura efisiénsia, efikásia, profisionalizmu no meritokrasia iha pesoál ministériu ida-ne’e nian,” nia subliña.

Tanba ne’e, Ministru anota kestaun kona-ba oinsá mak bele serbisu hamutuk iha ámbitu prosesu prienxe estrutura órganika ne’ebé iha ho pesoál sira ne’ebé adekuadu, kualifikadu no profisionál.

“Importante tebes atu parte rua ne’e kria ambiente relasaun ne’ebé di’ak, nune’e KFP prontu hodi fó apoiu no serbisu hamutuk,” nia adianta.

Jornalista     : Hortencio Sanchez

Editora          : Julia Chatarina

iklan
iklan

Leave a Reply

iklan
error: Content is protected !!