iklan

EKONOMIA

Governu sei hatuur mekanizmu foun hodi Timor Resources kontinua atividade explorasaun mina

Governu sei hatuur mekanizmu foun hodi Timor Resources kontinua atividade explorasaun mina

Ministru Petróleu, Francisco da Costa Monteiro. Imajen Tatoli/Francisco Sony

DILI, 16 setembru 2023 (TATOLI)Ministru Petróleu, Francisco da Costa Monteiro, komprometidu rezolve dezentendimentu entre empreza petrolífera, Timor Resources no Timor Gás no Petróleu, Empreza Públika (Timor GAP, E.P), nune’e bele kontinua explorasaun/perfurasaun mina iha posu rai-maran.

“Ami sei hatuur filafali mekanizmu foun hodi kria kontaktu ho empreza Timor Resources atu ita bele buka solusaun, nune’e permite empreza kontinua atividade exporasaun iha parte Ainaro no Same nian iha tempu badak, ne’ebé ha’u bele dehan iha kompromisu ida hosi Ministériu atubele buka solusaun,” Ministru hateten liuhosi programa Meet the Press iha Palásiu Governu, sesta (15/09).

Nu’udar ema tékniku iha área petrolífera, Governante ne’e akompaña Timor Resources halo ona serbisu ho di’ak ba atividade perfurasaun mina iha Suai no hetan rezultadu di’ak.

Bazeia ba diskusaun ne’ebé mak ha’u ho empreza Timor Resources halo ona, iha indikasaun posizitivu hosi perfurasaun iha posu rua hanesan Feto Kmaus no Lafaek iha Covalima, ne’ebé perfurasaun ikus ne’e hatudu katak iha poténsia boot, ita bele halo deskobrimentu mina ho gás ne’ebé ninia tamañu ne’e bele signifikante. Ha’u labele hateten hira loos, antes ne’e Governu halo ona verifikasaun ba perfurasaun ninia tamañu,” nia akresenta.

Ministru rekoñese, bainhira Timor Resources halo atividade perfurasaun mina iha posu Feto Kmaus no Lafaek iha Suai, Covalima, mosu disputa entre empreza no Timor GAP, E.P.

“Durante tinan-rua ho balun sira tenke buka solusaun, maibé la hetan solusaun to’o agora hodi nune’e Timor Resources loloos tenke avansa tan perfurasaun, maibé tenke para lai hodi rezolve tiha lai problema ne’e to’o hetan solusaun mak bele kontinua fali. Ami halo ona aprosimasaun ho Timor Resources,  ha’u rasik hetan ona esplikasaun no ha’u bele dehan katak  agora iha hela disputa, la’ós dehan katak ita labele rezolve, maibé ita sei buka solusaun iha tempu badak. Ministeriu foun agora akontese restrutursaun iha semana ida-ne’e no semana oin kona-ba entidade hotu-hotu iha setór petróleu ninian inklui iha Timor GAP,” nia adianta.

Notísia relevante : Ministru Victor orienta ANPM halo mediasaun ho Timor GAP, E.P no Timor Resources

Governante ne’e relata, Timor Resources gasta ona millaun $70 ba atividade perfurasaun tanba hanesan kompromisu ida ho Governu.

“Bainhira ita iha situasaun COVID-19 to’o tinan 2022, sira kontinua esforsu kontinua halo peskiza, ita bele dehan sira mak sai hanesan empreza pioneiru ba explorasaun. Kona-ba pagamentu ami sei buka solusaun di’ak ne’ebé permite kontinuasaun ba explorasaun ida-ne’e iha futuru,” Governante ne’e tenik.

Antes ne’e, Governu lansa konkursu públiku mina no gás hamutuk bloku 18, kompostu hosi tasi-laran 11 no rai-maran hitu, iha 03 outubru 2019. Timor Resources hanesan empreza manán-na’in ida ba explorasaun mina-matan iha rai-maran.

Governu liuhosi Timor GAP, E.P halo kontratu ho Timor Resources hanesan empreza operadór, ne’ebé hatuur katak iha faze explorasaun ne’e finansia totalmente hosi empreza operadór maibé bainhira tama ona iha faze produsaun maka Governu bele investe ka tau osan liuhosi Timor GAP, E.P.

Bazeia ba kontratu komersiál, bainhira Timor Resources halo explorasaun ho despeza liu millaun $55, Timor GAP, E.P tenke tama ona ho partisipasaun, maibé tanba la akontese no mosu dezentendimentu entre parte rua maka Timor Resources deside hapara atividade perfurasaun no sobu ekipamentu iha área perfurasaun posu Lafaek suku Labarai, postu administrativu Suai, munisípiu Covalima, nune’e bele rezolve problema.

Jornalista     : Natalino Costa

Editora          : Julia Chatarina

iklan
iklan

Leave a Reply

iklan
error: Content is protected !!