Índia hakarak partisipa iha dezenvolvimentu Timor-Leste

DILI, 02 outubru 2023 (TATOLI)–Primeiru-Ministru (PM), Kay Rala Xanana Gusmão, segunda ne’e, simu vizita hosi Ministru Estadu Relasaun Internasionál Índia, Rajkumar Ranjan Singh.
Biban ne’e, Xanana Gusmão, hateten, Índia prontu apoia Timor-Leste iha área oin-oin hanesan agrikultura, mina no gas, kapasitasaun rekursu umanu iha prosesu adezaun ba Asosiasaun Nasaun Sudeste Aziátiku (ASEAN, sigla inglés), hodi kontribui ba dezenvolvimentu.
“Ministru Estadu ba Relasaun Internasionál hosi India, mai vizita Timor, buat di’ak ida mak sira esforsu atu fó kapasitasaun ba timor-oan sira iha área saúde no diplomasia ajuda Timor prepara-an atu tama ASEAN, buat sira ne’e hotu di’ak tebes. Atu dehan Índia iha Timor nia kotuk, Índia mós hakarak partisipa iha dezenvolvimentu Timor nian, iha área saida de’it,” PM Xanana dehan, iha Palásiu Governu, segunda ne’e.
Notísia relevante : India observa atu harii embaxada iha Timor-Leste
Governu toma nota ona no diskute kle’an liután ho dipmomata Índia nian, ne’ebé Rezidente iha Jakarta, Indonézia.
Ministru Estadu Relasaun Internasionál Índia, Rajkumar Ranjan Singh, afirma katak prontu apoia Timor-Leste, prinsipalmente iha edukasaun, peskiza, petrokímika, esplorasaun mina no gás.
“Ami hakarak partisipa ho esperiénsia Índia nian durante ne’e hodi hetan oportunidade atu serbí ema Timor-Leste nian iha prosesu dezenvolvimentu nian. Ha’u fó parabéns ba Timor-Leste atu hakat sai membru ASEAN. Durante enkontru ho Primeiru-Ministru esplika kona-ba prosesu loos atu fó kbiit ba ita-nia ema nomós relasaun forte entre nasaun Ásia inklui prosesu kolaborativu no multi-dezenvolvimentu sira,” nia tenik.
Jornalista : Antónia Gusmão
Editora : Julia Chatarina

