Governu despede atleta Paralímpiku partisipa Asian Para Games

DILI, 05 outubru 2023 (TATOLI)—Governu liuhosi Primeiru-Ministru (PM), Kay Rala Xanana Gusmão no Ministru Juventude, Desportu, Arte no Kultura, Nelyo Isaac Sarmento, kinta ne’e, despede atleta Paralímpiku no ofisiál sira molok arranka bá Hangzhou, Xina hodi partisipa iha Asian Para Games, ne’ebé sei realiza iha loron 22 to’o 28 outubru 2023.
Delegasaun hamutuk 25, kompostu hosi atleta 11 hosi modalidade hiit besi, atletizmu no tenis meza, sei arranka iha loron 05 outubru no sei estadia iha Hangzhou durante semana rua.
Biban ne’e, Xanana Gusmão hato’o viajen di’ak ba delegasaun no enkoraja atu hatudu nafatin prestasaun di’ak.
“Boa viajen no susesu, hatudu katak problema kondisaun fízika la’ós atu hatún fali ema ida nia valór nu’udar umanu,” Xanana hato’o mensajen ne’e iha ámbitu serimónia despedida ho atleta timor-oan sira, iha salaun Prezidénsia Konsellu Ministru, Palásiu Governu.
Notísia relevante : Teofilo ho kondisaun defisiénsia foti oin Timor-Leste iha eventu internasionál
Xefe Governu husu ba atleta sira atu partisipa jogu ho di’ak no aplika matéria sira ne’ebé hetan durante treinamentu.
“Saida de’it mak imi atu halo iha ne’ebá, depende ba imi-nia treinu no esforsu ne’ebé imi halo tiha ona. Tanba ne’e ha’u labele husu buat barak, ha’u dezeja de’it bainhira imi to’o iha ne’ebá, imi buka halo saida mak imi bele, para filafali mai ita hamutuk ho sira seluk dezenvolve nafatin atividade desportu, la’ós de’it iha Paralímpiku maibé mós atividade desportu sira seluk. Se lae dehan ami la tau matan, tanba ne’e tinan-lima ne’e bele dezenvolve nafatin desportu,” Xanana komprometidu.
Hodi dehan tan: “ desportu ita husu saida de’it to’o iha ne’ebá lakon, no ida ita dehan defísil ne’e mak to’o iha ne’ebá manán. Maibé liu-liu relasaun ho maluk sira ne’ebé iha mós problema fíziku, relasaun di’ak ho sira, hodi sira bele mai para tulun imi hodi nune’e ita bele dezenvolve nafatin desportu.”
Aleinde ne’e, Xanana Gusmão bolu atensaun ba ofisiál, liu-liu Komité Paralímpiku Nasionál Timor-Leste atu atensaun ba regra hotu ne’ebé aplika, nune’e labele mosu fallansu ruma hodi difikulta atividade atleta sira.
“Imi-nia prezidente no ofisiál sira bá maka problema barak iha ne’ebá, ha’u sei haree imi,” PM bolu atensaun.
Iha biban hanesan, Ministru Nelyo Isaac Sarmento, garante katak sei la mosu fallansu ruma tanba ofisiál sira hatene ona prosedimentu ne’ebé implementa durante jogu ne’e hala’o, nune’e bainhira mosu buat ruma, Governu sei ejize sira-nia responsabilidade.
Governante ne’e dehan, atleta sira durante ne’e hamorin bebeik Timor nia naran iha jogu nível mundiál, hanesan foin lalais iha jogu internasionál sira iha tinan 2022, atleta Paralímpiku lori medalla osan-mean no osan-mutin.
“Espera katak tinan ne’e sira filafali mai nafatin ho prestasaun ne’ebé ita hotu hakarak. Ha’u fiar katak sira hotu preparadu ba ida-ne’e tanba sira iha kompromisu, liu-liu atleta sira ne’e pernah juara ona, katak sira sei mantein buat ne’ebé sira halo ona,” nia otimista.
Komité Paralímpiku Nasionál Timor-Leste halo preparasaun iha rai-laran uza osan rihun $50-resin, enkuantu ba kompetisaun rasik rihun $100-resin.
Atleta Pascoela dos Santos Pereira, hateten, nia parte prontu ona atu kompete iha Jogu Aziátiku.
“Ha’u la promete maibé ha’u sei esforsu hodi hamorin ha’u-nia nasaun nia naran,” Pascoela tenik.
Jornalista : Antónia Gusmão
Editora : Julia Chatarina

