DILI, 06 outubru 2023 (TATOLI –Konfederasaun Sindikatu Timor-Leste (KSTL), Almerio Vila Nova, hateten tau nafatin prioridade atu proteje direitu traballadór atu garante nafatin traballadór sira nia liberdade tuir konstituisaun Repúblika Demokrátiku Timor Leste (RDTL) hodi moris ho dignu.“KSTL prontu nafatin atu proteje no fó advokasia di’ak liu ba traballadór sira nia direitu ba kazu sira violasaun no explorasaun iha serbisu fatin,”, hateten Prezidente KSTL ne’e iha Lecidere.
Notísia relevante: KSTL lamenta Konsellu Ministru aprova saláriu mínimu $135
Kompromisu ne’e, Prezidente KSTL hato’o iha ámbitu kongresu ba dala VI ne’ebé hala’o durante loron rua, hahú sesta to’o sábadu ho tema “Novo kontratu sosiál nu’udar sentru ba dezenvolvimentu ekonomia no sosiál iha Timor-Leste”.
Iha kongresu nasionál ne’e KSTL foku ba pilar neen hanesan empregu, protesaun, saláriu, igualdade, inkluzividade no direitu atu proteje di’ak liután direitu traballador sira iha rai laran hodi fó moris dignu ba traballadór sira.
“Era dijitalizasaun no teknolójia, pandemia no mudansa klimátika hamosu inisitiva global ba nasaun hotu-hotu atu haree liu ba kontratu sosiál foun. Entaun Timor-Leste sei konsidera ba pilar ne’en”, dehan Presidente KSTL, Almeiru Vila Nova, Lesidere.
Iha kongresu ne’e mós sei hili estrutura foun atu lidera KSTL ba periode tinan ha’at oin mai.
Rejista kazu violasaun direitu traballadór 800
Durante mandatu, Prezidente KSTL ne’e relata hahú hosi 2019 to’o 2023, konsege rejista kazu violasaun direitu hasoru trabaladór hamutuk 800.
“Ita rejistu kazu violasaun sira ne’e mai hosi traballadór sira iha área edukasaun, marineiru, otelária, komersiu, karpintária, saúde ne’ebé mioria hetan problema ho saláriu hodi hamosu konflitu. Hosi kazu hirak ne’e kuaze 99% maki ta konsege rezolve liuhosi tripartida,” nia afirma.
Notísia relevante: KSTL husu emprezáriu no traballadór hametin kooperasaun
Nune’e, nia husu ba Governu atu tau nafatin prioridade ba revizaun saláriu mínimu iha ajenda polítika atubele trabaladór sira sustenta nia família hodi hetan saúde di’ak.
Bainhira traballadór ho família atu moris dignu, Dirijente KSTL ne’e dehan Governu tenke halo revizaun ba saláriu mínimu husi $115 ba $200 kada fulan. Tanba liuhosi prosesu peskiza ida ne’ebé mak KSTL halo, bainhira hakarak konsidera traballadór ida nia moris dignu iha fulan ida nia laran só hetan saláriu $200 iha fulan ida ho baze ba kálkulu ba nesesidade báziku.
Iha fatin hanesan, Reprezentante Sekretáriu Estadu Formasaun, Profisionál no Empregu, Ângelo Santos Velorio, kompromete kontinua parseria ho KSTL atu solusiona kazu konflitu entre traballadór sira ho empregador.
Notísia relevante: Prezidente KSTL: “Rendimentu Di’ak Maka Bele Hadi’a Kualidade Moris Traballadór ho Dignu”
Jornalista: Jesuína Xavier
Editór : Florencio Miranda Ximenes
