ANCT sensibiliza rejime kontrola tabaku ba vendedór Oé-Cusse
OÉ-CUSSE 18 outubru 2023 (TATOLI – Aliansa Nasionál Kontrolu Tabaku (ANCT, sigla portugés) Timor-Leste, hamutuk ho Autoridade Rejiaun Administrativa Espesiál Oé-Cusse Ambeno (RAEOA), kuarta ne’e sensibiliza dekretu-lei númeru 14/2016, kona-bá rejime kontrolu tabaku ba vendedór sira iha rejiaun refere.
Notísia relevante: ANCT-TL motiva joven RAEOA redús fuma tabaku kria sosiedade saudavél
Diretór ezekutivu ANCT-TL, Sancho Belito Fernandes, informa, objetivu sensibilizasaun ne’e atu hasa’e vendedór sira-nia koñesimentu kona-bá matadalan vendedór nian hodi kumpri rejime dekretu-lei kontrolu tabaku nune’e bele prevene hosi kontra-bandu.
“Sensibilizasaun ne’e sei ajuda mós vendedór sira, bele implementa lei ne’e ho métodu ne’ebé di’ak no seguru atu labele sai vítima ba sira-nia negosiu,” Sancho Belito Fernandes, ba jornalista sira hafoin hala’o sensibilizasaun iha salaun administrasaun Numbei, Oé-Cusse.
Iha sensibilizasaun ne’e, ANCT mós fasilita matéria formasaun liuhosi diskusaun grupu no loke diálogu ba negosiante sira kona-bá oinsá atu implementa rejime dekretu-lei kontrolu tabaku ne’e ho loos.
“Depois ita hamutuk ho Autoridade RAEOA ba hasai objetu promosaun tabaku iha dalan públiku sira, hanesan meiu ida atu kumpri lei kontrolu tabaku, liuliu lei 19 kona-bá bandu promosaun no vízita loza no kioske sira hasai objetu promosaun no taka poster sosializasaun ne’e ba loza no kioske iha Oé-Cusse laran,” nia informa.
Atividade ne’e, ANCT realiza alvu ba munisipíu tolu ne’ebé besik fronteira, tanba bazea dadús hosi ANCT rasik, hatudu tabaku ilísitu maioria tama hosi fronteira, nune’e presiza hasa’e konsiensializasaun ba vendedór sira nune’e prevene tranzasaun ilísitu iha fronteira.
Adjuntu Prezidente Autoridade RAEOA ba Asuntu Sosiál, Maximiano Neno, esplika, agradese ba ekipa ANCT, tanba atividade sensibilizasaun ne’e importante ba negosiante sira iha Oé-Cusse Ambeno.
“Ha’u lori Autoridade nia naran, agradese ba ANCT tanba bele hakat mai Oé-Cusse atu fanun ita hotu tanba ita besik fronteira luan tebes, ne’ebé liuhosi sensibilizasaun bele fó hanoin mai ita atu kontriui hanoin no ideia ba rejime dekretu-lei kontrolu tabaku,” nia orgullu.
Notísia relevante: ANCTL apresia inisiativa Governu hasa’e folin tabaku
Entretantu, ANCT implementa atividade sensibilizasaun ne’e, hetan apoia hosi SASCAS, alvu ba munisípiu tolu hanesan; Bobonaro, Covalima no RAEOA.
Jornalista: Abílio Elo Nini
Editór: Evaristo Soares Martins
