DILI, 10 novembru 2023 (TATOLI)–Sekretáriu Estadu Veteranu (SEV), Cesár dos Santos da Silva, hateten kombatente 12 Novembru kuaze 600-700 nia naran mak tama iha lista verifikasaun dadus veteranu rejistadu 2009 atu hetan subsidiu.
Notísia Relevante: Ekipa verifikasaun nasionál sei verifika fali dadus veteranu iha fevereiru
“Horibainrua sira-nia ekipa mai hasoru ha’u lori sira-nia lista kombatente ne’ebé seidauk hetan subsidiu. Entaun, horisehik sira mai, ami orienta ona tékniku hodi ministériu nian hodi haree no emprime, nune’e entrega ba sira. Horisehik sira halo verifikasaun no tinan oin ami taka sai kuandu sira prienxe kritériu,” nia hateten ba Agência Tatoli iha nia kna’ar fatin, Caicoli, sesta ne’e.
Kona-ba verifikasaun ba membru komité 12 Novembru nian ne’e, nia hateten, realmente sira barak mak halo ona verifiakasaun ho hetan ona sira-nia direitu maibé balun seidauk hetan tanba tama iha rejistu faze daruak nian ba tinan 2009, tanba ne’e segundu rejistu validasaun la’o hela.
“Konkretamente kalendáriu ba 12 Novembru nian mak kinta (09 novembru) horisehik, hahú ona ba prosesu verifikasaun no hein taka sai iha tinan oin,” nia dehan.
Prezidente Komité 12 Novembru (C12N), Gregório Saldanha, hateten rejistu naran libertasaun nasionál sira inklui kombatente 12 Novembru nian ne ebé rejista iha 2003 no dadus 2003 nian balun ne’ebé dadus loos ona mós seidauk hetan sira-nia direitu.
“Tuir Estadu nia politika liuhosi Comissão Homenagem/MACLN, kombatente sira-ne’ebé loos ona, simu ona medalla no subsidiu. Maibé, balun dadus loos ona mós seidauk hetan sira-nia direitu. Oras ne’e prosesu sira-nia direitu la’o hela. Ita hein atu ema hotu ne’ebé loos tenke hetan sira-nia direitu, no verifikasaun ba dadus rejistadu 2009 ninian. Nune’e, hasai sira-ne’ebé mak nia dadus falsu no bosok tuir lei haruka,” nia dehan.
Jornalista : Osória Marques
Editór : Cancio Ximenes
