VIQUEQUE, 13 novembru 2023 (TATOLI)—Kandidatu xefe suku Uaitame, postu administrativu Uatulari, munisípiu Viqueque, Marcelino P. Alves, ne’ebé kompete iha eleisaun órgaun suku tinan 2023 ba segunda volta, lidera ho votu 489 hosi totál eleitór.
“Eleisaun ramata iha tuku 15:00, ho rezultadu kandidatu númeru sorteiu 1, Marcelino P. Alves hetan votu 489, enkuantu kandidatu númeru sorteiu 2, Noemio G. A Fernandes hetan votu 356. Nune’e, rezultadu votasaun ne’ebé ha’u simu hosi aldeia lima, kandidatu númeru sorteiu 1 maka manán iha eleisaun segunda volta,” Xefe suku Uaitame, José do Rosário, informa ba Agência Tatoli, hafoin ramata kontajen votu, iha suku Uaitame, segunda ne’e.
Notísia relevante : CNE Viqueque rejista irregularidade tolu durante eleisaun órgaun suku
Akta rezultadu votasaun sei transporta ba sede suku hodi kontinua halo apurametu iha suku.
“Kontajen votu iha sentru votasaun lima ne’e finál ona no rezultadu provizóriu ba sede suku aban (tersa), ita sei halo apuramentu iha suku hodi fó sai rezultadu finál ba eleisaun segunda volta. Ho rezultadu kontajen ida-ne’e, ha’u husu ba juventude suku Uaitame hodi mantein kria pás no estabilidade iha ita-nia suku no labele halo barullu, haklalak no sadik malu kona-ba lakon no manán,” nia hato’o.
Tuir observasaun jornalista Agência Tatoli iha iha terrenu, nota katak sentru votasaun iha suku Uaitame, kada aldeia iha kabina votu rua, enkuantu iha eleisaun primeira volta iha kabina votu ida.
Eleisaun segunda volta iha suku Uaitame, to’o tuku 12:00 meiu dia, eleitór hahú menus iha sentru votasaun.
Iha eleisaun primeira volta iha kandidatu hamutuk na’in-neen, maibé ikus mai mai hetan rezultadu kandidatu Marcelino P. Alves ho votu 287 no kandidatu Noemio G.A Fernades ho votu 220, nune’e kandidatu rua ne’e mak avansa ba etapa tuir mai.
Suku Uaitame kompostu hosi aldeia lima hanesan Sana, Uma-Ki’ik, Raila’a, Foho-Manu no Macadique.
Jornalista : Vitorino Lopes da Costa
Editora : Julia Chatarina
