DILI, 17 novembru 2023 (TATOLI)–Prezidente Komité 12 Novembru (C12N-sigla portugés), Gregório Saldanha, hateten sobrevivente 12 Novembru balun agora entrega hikas medalla tanba sira tauk halo juramentu.
Notísia Relevante: Verifikasaun dadus veteranu rejistadu 2009, SEAKLN valida ona 75%
“Kombatente 12 Novembru ne’e iha 800 mak simu ona medalla no subsídiu. Maibé númeru ne’e sei menus tan, tanba iha balun ne’ebé entrega fali medala tanba sira tauk halo juramentu. Osan ne’e maihosi raan ho ruin, ne’ebé kuandu inventa sei hetan nia konsekuénsia hosi subsídiu ne’e,” nia dehan ba Agência Tatoli, iha nia kna’ar fatin, kinta ne’e.
Komité 12 Novembru hato’o agradesimentu ba hirak ne’ebé entrega fali ona medalla, tanba sira brani no kontribui ona iha situasaun defisil ne’e tenke hatene-aan labele inventa sasán tanba midar agora de’it no depois neineik mak foin sente nia konsekuénsia.
Tanba ne’e, nia husu ba ekipa verifikasaun hosi Komité 12 Novembru ne’ebé atu ba verifika dadus veteranu rejistadu 2009 ne’e karik, tenke hateten buat ne’e loos no labele bosok atu hetan subsídiu, tanba nia konsekuénsia ladi’ak ba família no ba ema ida-idak nia moris iha futuru.
Tuir nia, hosi primeiru rejistu to’o sergundu rejistu ba kombatente ka ema-ne’ebé envolve-aan iha manisfestasaun pásifika 12 Novembru 1991 ne’e, ema hamutuk 800 mak simu ona subsídiu hosi Governu.
“Sira-ne’ebé mak hetan ona pensaun ne’e 800 no hetan medalla hamutuk 1.200 hosi totál 2.900. Hosi ne’e ami servisu makaas atu nune’e Komité 12 Novembru nia emar hetan subsídiu, tanba ekipa agora hela verifikasaun ba dadus veteranu rejistadu 2009 nian iha territóriu nasionál,” nia dehan.
Entretantu, iha 16 novembru 2023, Komité 12 Novembru marka audiénsia ho Sekretáriu Estadu Veteranu (SEV), Cesár do Santos “Merak”, hodi informa preparasaun validasaun dadus segundu rejistu iha 2009 ne’ebé mak Komité 12 Novembru sei verifika kombatente sira-ne’ebé pertense ba manifestante no mate restu 12 Novembru.
Komité 12 Novembru apezenta ona lista hamutuk 1.168 ba Ministru Asuntu Kombatente Libertasaun Nasionál (MACLN), Gil da Costa “Oan Soru”, katak hosi dadus ne’e iha munisípiu 13 no diaspóra ne’e hamutuk ema 1,168 mak seidauk verifika.
Dadus hirak ne’e mai hosi munisípiu Aileu hamutuk 38, Ainaro hamutuk 41, Baucau hamutuk 109, Bobonaro hamutuk 65, Covalima hamutuk 23, Dili hamutuk 545, Ermera hamutuk 47, Lautém hamutuk 51, Liquiça hamutuk 24, Manatuto hamutuk 57, Manufahi hamutuk 50, RAEOA hamutuk sia (9), Viqueque hamutuk 108 no diáspora iha ema na’in-ida (1).
Tuir planu, Komité 12 Novembru sei hahú verifika baze dadus iha Ministru Asuntu Kombatente Libertasaun Nasionál (MACLN) hosi hosi 20 novembru 2023 to’o 06 dezembru 2023.
Notísia Relevante: Veteranu la partisipa prosesu verifikasaun to’o 30 novembru sei esklui
Jornalista : Osória Marques
Editór : Cancio Ximenes
