COVALIMA, 20 novembru 2023 (TATOLI) – Munisípiu Covalima selebra Loron Proklamasaun Independénsia ba dala-48, iha 28 novembru ne’e ho orsamentu hamutuk $11.878,75. Tema ba komemorasaun ne’ebé Governu deside mak “Selebra istória, harii futuru”.
Prezidente Komisaun Organizadora 28 Novembru, atuál Diretór Finansa Munisípiu Covalima, Damião Amarál, informa katak preparativu sira ne’ebé halo ne’e mak aloka verba ba postu administrativu neen hamutuk $ 6,500, iha ne’ebé Zumalai hetan $1.500 no postu sira seluk rihun $1.
“Razaun aloka orsamentu ba postu administrativu Zumalai liu postu sira seluk, tanba Zumalai iha nia suku ualu”, esplika.
Nia salienta katak orsamentu seluk aloka ona ba seksaun sira hanesan serimónia iha verba $2.163, liturjia $310, dekorasaun no lojístika $1.321, limpeza no saneamentu $170, seguransa $90., iluminasaun $ 250, animasaun $205, primeiru sukorru $20, dokumentasaun $50 no seluk tan. Orsamentu ba konsumu nian mai husi Sekretariadu Tékniku Administrasaun Eleitorál Covalima hamutuk $3.320.
Sekuénsia ba selebrasaun loron proklamasaun mak sei hala’o misa agradesimentu, hafoin misa tau ai-funan iha monumentu Masakre Setembru Negro 1999, serimónia isar bandeira no fó pose ba xefe suku foun sira.
Rekorde katak, iha 28 novembru 1975, unilateralmente FRETILIN deklara proklamasaun independénsia Timor-Leste nian ba mundu, ho primeiru Prezidente Repúblika mak Francisco Xavier do Amaral no Nicolau Lobato simu kargu hanesan Primeiru-Ministru hodi ikus fali mai sai mós hanesan primeiru líder rezisténsia armada.
Liu de’it loron 10, iha loron 07 dezembru 1975, Indonézia hahú invade Timor-Leste ho razaun atu proteje nia sidadaun iha territóriu Timór laran tomak, tanba tauk karik FRETILIN majia rai Timor-Leste sai fatin ba doutrina marxista no lenenista sai buras.
Jornalista: Celestina Teles
Editora: Maria Auxiliadora
