Empreza Woodside komprometidu servisu ho Governu iha plantasaun Greater Sunrise
DILI, 20 novembru 2023 (TATOLI)—Empreza Woodside komprometidu servisu hamutuk nafatin ho Governu Timor-Leste hodi hala’o esplorasaun projetu mina-rai iha plantasaun Greater Sunrise.
Notísia Relevante: Governu sei hasoru malu ho Woodside diskute dezenvolvimentu Greater Sunrise
“Ohin, mai hala’o ekontru ho Primeiru-Ministru, Kay Rala Xanana Gusmão, hodi diskute kona-ba projetu Greater Sanrise. Primeiru-Ministru nia mensajen klaru oinsá servisu hamutuk dezenvolve Greater Sanrise ba benefisiu ba Timor-Leste,” CEO Woodside, Meg O’Neil, hateten hafoin hala’o enkontru ho Primeiru-Ministru, Kar Rala Xanana Gusmão, ne’ebé akompañadu hosi Ministru Petroleo no Rekursu Minerál, Fransisco Monteiro, iha Palásiu Governu, segunda ne’e.
Empreza Woodside hato’o agradesimentu no sempre servisu hamutuk hodi hametin kooperasaun ida-ne’ebé di’ak-liu ba interrese nasionál.
Durante enkontru, Primeiru-Ministru Xanana Gusmão informa Timor-Leste no Austrália sei kontinua servisu hamutuk hodi dezenvolve projetu Greater Sanrise ne’ebé sei muda konseitu dezenvolvimentu rai rua ba futuru.
Antes ne’e, iha loron 18 Setembru 2023, PM hala’o enkontru ho Reprezentante Spesiál Governu Austrália ba Negosiasaun no Dezenvolvimentu Greater Sunrise, Steve Bracks, informa katak Timor-Leste no Austrália sei hakle’an iha diskusaun asuntu teknika fulan-juñu tinan 2024.
Austrália rekoñese projetu Greater Sunrise importante tebes ba povu no família Timor-Leste hotu, nune’e Austrália komprometidu servisu ho Timor-Leste oinsá mak atu dezenvolve projetu (Greater Sunrise) ne’e ba oin iha maneira teknikamente viavel no komersialmente.
TL no Austrália sei hapara diverjénsia hotu-hotu iha pasadu, atu nune’e povu rai rua, Australianu no Timoroan, bele haree futuru relasaun iha konfiansa boot no respeitu mútua ne’ebé boot liu.
Notísia Relevante: Estudu Greater Sunrise: TL-Austrália no Woodside sei aborda tan dokumentu tolu
Jornalista : Osória Marques
Editór : Cancio Ximenes
