iklan

NASIONÁL, HEADLINE, KAPITÁL

PM Xanana organiza ekipa ko’a ai fó risku ba komunidade iha Taibesi

PM Xanana organiza ekipa ko’a ai fó risku ba komunidade iha Taibesi

Primeiru-Ministru, Kay Rala Xanana Gusmão no ekipa responsável ko’a ai halihun boot iha Taibesi Matando, iha fim de semana. Imajen/Mídia GPM

DILI, 04 dezembru 2023 (TATOLI)Primeiru-Ministru (PM), Kay Rala Xanana Gusmão, iha fim de semana (sexta no sábadu), akompaña hosi Ministru Obra Públika, Samuel Marçal, organiza ekipa Bombeiru no Eletridade de Timor-Leste (EDTL), inklui Saneamentu munisípiu Dili, hodi ko’a ai halihun boot iha Taibesi Matando, postu administrativu Na’in Feto, munisípiu Dili.

Xanana no ekipa halo atividade ne’e hafoin populasaun sira ne’ebé hela besik iha ai-hun ne’e hato’o proposta ba Primeiru-Ministru hodi husu ajuda ko’a ai refere, tanba ai halihun boot ne’e ninia kondisaun komesa dodok ona no iha preokupasaun bele monu bainhira tempu udan no anin.

Ho asaun Xefe Governu ne’e, Abitante lokál, Lili Branco, konsidera asaun ne’e estraordinária tanba bele proteje komunidade hosi risku dezastre.

“Hanesan povu kiik, ami hato’o obrigadu barak ba Avo Nana, ekipa Bombeiru no EDTL, bele mai ajuda ona ami, tanba ami tauk liu kuandu tempu udan no anin hali ne’e bele tohar monu ba ami-nia uma leten,” Lili dehan liuhosi nota ne’ebé Agência Tatoli asesu, segunda ne’e.

Notísia relevante : PM Xanana husu juventude hola parte iha kompetisaun harii prezépiu natál

Iha fatin hanesan, Diretór Bombeiru Dili, Paulo Maia, informa, ekipa lori ekipamentu kompletu hodi ko’a hali ne’e to’o kotu, tanba ekipa Ministériu Obra Públika (MOP), EDTL no Saneamentu Dili apoia transporte.

“Iha etapa dahuluk, ekipa ko’a uluk hosi leten, hafoin kontinua ko’a nia hun, tanba hali ne’e pezu boot tama to’o estrada no komunidade nia uma,” nia tenik.

Ekipa Bombeiru mós halo ona identifikasaun iha Dili laran, liu-liu parte Postu Estabelesementu Kuluhun nian, sei ko’a ai boot ne’ebé nia hun no sanak moris tama to’o estrada.

Atividade ne’e hetan apoia hosi komunidade, ne’ené ajuda foti ai hirak ne’ebé tesi no tula kedas ba karreta saneamentu hodi ba soe iha lixeira tibar.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!