COVALIMA, 06 dezembru 2023 (TATOLI) – Diretór Servisu Agrikultura Covalima, Reinaldo Moniz Coli, relata progresu implementasaun programa haat iha 2023 hanesan estensaun agríkola, atividade pekuária no veterinária, floresta no planta industriál, peska no akikultura.
Dirijente ne’e dehan implementasaun programa sira ne’e mak ba estensaun agríkola ne’ebé hahú iha tinan 2022-2023 hala’o ona atividade prátika agrikultura di’ak liuhusi tékniku estensionista postu administrativu no suku hodi halo preparasaun rai to’o iha kolleta no pós-kolleta ba iha komoditi sira hanesa batar, hare, fore-mungu, fore-rai no modo.
Departamentu estensaun agríkola organiza mós tratorista sira hodi fila rai iha parte rai tetuk iha postu administrativu sira hanesan Suai, Zumalai Tilomar no Maucatar hodi halo preparasaun kuda batar, hare, fore-mungu no fore-rai.
Ba atividade pekuária no veterinária nian, Agrikultura Covalima kuda ai-kafé no lamtoro hamutuk 23.690 hodi prepara ai-han ba karau ne’ebé kria husi grupu hitu iha postu administrativu Suai hamutuk haat, Tilomar ida no Maucatar ida. Kada grupu haki’ak karau rua tuir tékniku pekuária atu hetan nia rezultadu produsaun iha futuru.
Kona-ba programa floresta no planta industriál halo ona atividade viveiru iha Maucatar hamutuk 12.836 kompostu husi tipu ai-mahoni 10.151, ai-kakeu 1.518, ai-saria 1.117 no bainhira iha tempu udan bele kuda.
Reinaldo Moniz Coli salienta mód katak Floresta Covalima mós halo atendimentu ba komunidade atu ko’a ai hodi konstrui uma-adat no privadu ho tipu ai oioin nomós atende empreza sira ko’a no fa’an ai hodi kontribui reseita ba kofre Estadu.
“Implementasuan programa peska no akikultura nian mak peskadór sira hala’o atividade peska hahú iha janeiru to’o outubru no fa’an ona ikan talin hamutuk 32.521 husi totál ikan 182.121 ne’ebé sira hetan. Husi atividade ne’e peskadór sira hetan ona lukru $31.179”, informa.
Aleinde ne’e, hala’o atividade formasaun ba agrikultór na’in-35 husi postu administrativu Fatululik no Fohorem ho nia objetivu atu hasa’e koñesimentu tékniku ba konstrusaun kolam ikan, haki’ak ikan no transforma ikan hodi halo ba bakso no nugget hodi aumenta valór adisionál nutrisaun hodi bele fó saúde di’ak.
Notísia relevante: Servisu Agrikultura Covalima laiha estoke fini atu distribui ba agrikultór sira
Jornalista: Celestina Teles
Editora: Maria Auxiliadora
