Top

Komandu PNTL Viqueque orienta hodi hahú investiga kazu membru tiru joven

Komandante PNTL munisípiu Viqueque, Superentendente, João da Costa. Imajen Tatoli/Vitorino Lopes da Costa

VIQUEQUE, 13 dezembru 2023 (TATOLI)—Komandu Polísia Nasionál Timor-Leste (PNTL) munisípiu Viqueque liuhosi Unidade Investigasaun hahú halo prosesu ba kazu membru ida tiru joven ho naran Jainito da Silva.

“Membru Polísia tiru joven horiseik ne’e, ha’u orienta ona Unidade Investigasaun Komandu PNTL nian hodi ba halo ona investigasaun ba membru no horikalan kedan halo dezarma ba membru ne’e, maibé kontinua serbisu. Prosesu  investigasaun sei la’o hela, banhira hotu mak ami aprezenta ba Ministériu Públiku hodi prosesa kazu ne’e,” Komandante PNTL munisípiu Viqueque, Superentendente, João da Costa, informa ba Agência Tatoli, iha ninia knaar fatin, iha Beskem, kuarta ne’e.

Notísia relevante : Membru Polísia tiru kanek joven ida iha área Parókia Viqueque

Komandante Polísia konta tuir, konfrontu dahuluk bainhira grupu joven rua hosi Mersida no Boromatan postu Viqueque Vila tuda malu iha jardín 1959 nian laran iha tersa (12/12), maizumenus tuku 16:00 lorokraik.

Nune’e, parte Polísia sira tun hodi halo atuasaun no joven sira fahe malu, ikus mai situasaun la’o normál. Hafoin ida-ne’e, grupu rua ne’e hahú halo problema ba malu iha fatin ketak.

“Joven sira kontinua tuda malu fali iha área Parókia Viqueque Vila, maizumenus tuku 17:00 no momentu ne’ebá iha Polísia na’in-lima tun hodi halo atuasaun, Polísia tama tiha ba klaran hodi ko’alia ba joven sira hodi para, maibé joven sira la rona no kontinua tuda malu, balun halai mai igreja oin no tuda hasoru Adjuntu Polísia Eskuadra Viqueque Vila dala-rua, nune’e membru Polísia ne’e tiru joven ida kona nia ain iha parte kelen loos,” Komandante Polísia, akresenta.

Hafoin ne’e, joven sira ne’ebé tuda malu halai namkari, tuda malu mós para no Ambulánsia tula joven kanek bá Ospitál Internamentu hodi halo tratamentu.

“Parte investigasaun iha kalan ne’e kedan hasai ona dadus hosi parte joven hetan tiru, nune’e bele aprezenta ba Ministériu Públiku,” nia hato’o.

Hosi parte seluk, abitante balun haktuir katak joven ne’ebé hetan tiru la sala, maibé nia hamutuk ho joven ne’ebé envolve ne’e iha merkadu maka ikus mai hetan tiru.

“Akontese ona kanek komesa deklara dehan la sala, maibé ha’u la defende ema ida tantu membru no joven, depois submete ba justisa maka termina no deside ida-ne’ebé loos,” nia afirma.

Ho akontementu ne’e, Komandante Polísia husu joventude no Autoridade lokál hodi kolabora hamutuk ho Autoridade seguransa hodi kria pás estabilidade iha munisípiu Viqueque.

“Ami mós kria ona planu seguransa hodi kontrola bairru sira-ne’ebé  akontese beibeik problema. Tanba ami identifika labarik ki’ik-oan sira maka provoka malu beibeik, ne’ebé husu hakmatek iha ida-idak nia fatin,” nia apela.

Jornalista     : Vitorino Lopes da Costa

Editora          : Julia Chatarina

Publisidade

Leave a Reply

Latest Post

error: Content is protected !!