DILI, 15 dezembru 2023 (TATOLI)-Governu liuhosi Ministériu Komérsiu no Indústria (MKI) no Sekretáriu Estadu Arte no Kultura (SEAK), sesta ne’e, fó prémiu ba grupu vensedór iha kompetisaun soru tais, sotis no futus, dansa kulturál, poésia no sertame iha loron nasionál Tais iha Sentru Konvensaun Dili (CCD, sigla portugés).
Ministru Komérsiu no Indústria (MKI), Filipus Nino Pereira, hateten tais nu’udar liman fatin no matenek husi beialan sira, tanba ne’e presiza prezerva no promove liuhosi atividade oin-oin.
“Governu sei halo esforsu oin-oin atu promove tais, tanba sai identidade kultural”, Governante ne’e afirma iha ámbitu fahe priméiu ba grupu vensedór sira CCD-Dili.
Nune’e, Governante ne’e husu foinsa’e sira tenke sai promotór ba produtu tais hodi hatutan ba jerasaun foun.
Kompetisaun ba soru tais futus no sortis partisipa husi grupu sira hosi munisípiu Ataúro, Ainaro, Bobonaru, Baucau, Ermera, Lautém, Lequiça, Lautem, Manatuto, Rejiaun Administrativu Espesiál Oékusse Ambeno no Viqueque.
Grupu vensedór hetan priméiu mak hanesan primeiru lugar Dulmadik Ana husi munisípiu Ainaro ho valor $800, grupu tais segundu lugar husi Oe-kusse ho valór $750, terseiru lugar ho $700 ba to’o desimu lugar ho montante $350 no restante grupu hetan hotu $100.
Kompetisaun dansa kulturál partisipa husi grupu Santo António klasifikadu ba primeiru lugar hetan prémiu $500, Le-zival seniór okupa segundu lugar ho prémiu valor $400, Timor Furak sai treseiru lugar no prémiu hetan valór $ 350, Universidade Nasionál Timor Lorosa’e (UNTL) hetan prémiu valór 300 no Foinsa’e Rumbia Caicoli hetan$250.
Entretantu ba kompetisaun sertame partisipa husi Institutu Of Bussines no sai primeiru lugar no hetan valór prémiu $350, UNTL mak okupa klasifikasaun daruak ho prémiu valór $300, Dili Institutu Tecnology ho valór $250 no Universidade Oriental Timor Lorosa’e hetan prémiu $200.
Kompetisaun poezia patisipa husi estudante UNTL Martinho Soares tasi hetan prémiu primeiru lugar ho $350 no Anita Amaral segundu lugar $300 no Arnaldo Horta terseiru lugar ho prémiu $250 no Jaime da Costa husi UNTL hetan prémiu $200.
Iha kompetisaun ne’e partisipa husi ema 24, maibé elimina hotu hafoin ekipa juri halo selesaun.
Reprezentante vensedora ba soru Tais Futu husi Grupu Dulmadik Ana konstitui ema 20 husi munisípiu Ainaro, Alexadrina da Costa Silva, sente kontente tanba bele simu prémiu husi Governu ba soru tais futus.
“Ami foin mai tuir kompetisaun primeira vez hetan primeiru lugar, no iha tempu ida ne’e ha’u orgullu tebes, tanba ami mai ne’e ho munisípiu Ainaro nia naran mak mai aprezenta soru tais iha kompetisaun ida ne’e”, nia hateten ba Tatoli, iha CCD.
Grupu soru futus hanesan Lafaek, mapa no ai-funan ho medida sentimetru 4,5 to’o centimentru 5 no juri sira haruka grupu ne’e soru tais medida luan sentimetru 70, nia naruk iha tais isin ho metru rua no 2 inklui luan sentimentru 30.
Iha biban hanesan, Martinho Soares Tasi husi Fakuldade Edukasaun Arte no Umanidade husi UNTL nu’udar vensedor ba kompetisaun poezia hatete poizia ne’ebé nia lori ho títulu “Buibere nia liman mak maubere nia tais”.
“Poezia ne’e ha’u mak hakerek rasik. Ha’u hakerek poezia ne’e liu husi referensia loron lee livru, rona istória ne’ebé ajuda ha’u. Maske iha dezafiu, maibé sente kontente bele sai vensedór iha kompetisaun hakerek poezia kona-bá tais”, nia afirma.
Nune’e, nia husu ba maluk foinsa’e sira atu promove tais liuhusi sira talentu no kreatividade oin-oin, tanba tais nu’udar rikueza ema timoroan nia ne’ebé beialan sira husik hela.
Jornalista: Jesuína Xavier
Editór : Florencio Miranda Ximenes
