OJE ba IPB aprovadu iha espesialidade
DILI, 19 dezembru 2023 (TATOLI) – Orsamentu Jerál Estadu (OJE) 2024 ba Institutu Politékniku Betano (IPB) ho montante $1.508.174 hetan ona aprovasaun iha debate espesialidade iha plenária Parlamentu Nasionál, tersa ne’e, ho votu afavór 42, kontra 5 no abstensaun 18.
Orsamentu ba IPB ne’e, atu koloka ba programa prioridade rua mak hanesan funsionamentu dezenvolvimentu institusionál no atu haforsa ka apoiu programa iha instituisaun ensinu superiór nia laran.
Prezidente IPB, Acacio Cardoso Amaral relata katak totál orsamentu ne’ebé parte instituisaun tau ona ba tinan 2024 hodi reforsa planu no programa prioridade rua ne’e hatúr ona iha kategória sira mak hanesan saláriu no vensimentu prevee osan ho montante $564.943, bens no servisu $423.710, transferénsia públika $111.990, kapitál menór $131.000 no kapitál dezenvolvimentu $276.531.
Orsamentu sira-ne’e, nia hatutan, instituisaun prevee atu realiza planu no atividade rutina sira hodi aselera programa estájiu, atividade graduasaun, atividade aprendizajen no atividade prátika inklui sosa tan ekipamentu sira atu apoiu IPB.
Notísia relevante: Finalista sira iha Covalima realiza teste eskrita asesu ba UNTL no IPB
“Ita sei sosa tan ekipamentu balun hodi fasilita no apoiu iha auditóriu ne’ebé seidauk kompletu ho mobiliáriu no komputadór sira nune’e bele aselera atividade sira ne’ebé mak realiza iha instituisaun nia laran,” Acacio ba Tatoli iha Parlamentu Nasionál.
Nia mós haktuir katak husi montante osan ne’ebé aprova ona sira mós sei instala tan mini matadouru ida nune’e bele fasilita estudante sira bele hala’o sira-nia programa prátika inklui atu apoiu mós reseita ba estadu hodibele kontribui ba dezenvolvimentu edukasaun iha ensinu superiór IPB nia laran.
Husi programa prioridade kona-ba funsionamentu no dezenvolvimentu institusionál nian ne’e, Acacio informa, IPB iha mós planu atu insala tan edifísiu foun ida ba lojístika no edifísiu ba aprovizionamentu.
Enkuantu, Deputadu Bankada Opozisaun KHUNTO, António Verdial hateten maski orsamentu aprova ona iha Parlamentu Nasionál maibé nia husu ba IX Governu Kontitusionál atu kontinua fó atensaun másima ba IPB tanba sira-nia dezenvolvimentu to’o agora la másimu.
Tuir nia katak atu tulun jerasaun foun iha futuru, IPB tenke hetan dezenvolvimentu ida adekuadu.
Iha fatin hanesan, Ministru Ensinu Superiór Siénsia no Kultura (MESSK), José Honório Jerónimo deklara katak IPB daudaun ne’e iha hela faze dezenvolvimentu, signifika, sira-nia edifísiu balun iha hela prosesu konstrusaun no fiar katak ba futuru sira sei hetan dezenvolvimentu ida di’ak liu nune’e bele garante progresu akadémiku ida adekuadu.
“Ha’u hanoin, iha 2024 ne’e ita sei hadi’a sira-nia edifísiu halo di’ak liután nune’e iha futuru sira bele hetan edifísiu ida di’ak hodi garante prosesu akadémiku ba estudante sira,” nia tenik.
Jornalista: Tomé Amado
Editór: Rafael Ximenes de A. Belo
