OJE UNTL $17.281.336, sei aloka ba programa prioridade tolu

DILI, 19 dezembru 2023 (TATOLI) – Orsamentu Jerál Estadu (OJE) 2024 ba Universidade Nasionál Timor Lorosa’e (UNTL) ho montante $17.281.336 sei aloka ba prioridade tolu mak hanesan funsionamentu no dezenvolvimentu institusionál, edukasaun ka formasaun no inkluzaun sosiál.

Orsamentu ne’ebé pasa ona iha debate espesialidade ho votu afavór 44, kontra 0 no abstensaun 21 iha tersa ne’e, ninia kategoria mak hanesan saláriu no vensimentu $12.822.077, bens no servisu $4.345.751, transferénsia públika $3.000, kapitál menór $110.508 no kapitál dezenvolvimentu zero.

Deputadu Bankada Opozsiaun FRETILIN, Antoninho Bianco esklarese husu ba Ministru Ensinu Superiór Siénsia no Kultura (MESSK), José Honório Jerónimo atu kontinua tau atensaun ba UNTL hodi bele kontinua garante kualidade iha universidade públika ne’e liu-liu iha atividade pesiza sientífiku sira.

Notísia relevante: UNTL mellora infraestrutura sira hodi garante ensinu ho kualidade

“Ita rona ona katak Institutu Politéknika Betano (IPB) nu’udar instituisaun ida maibé sira hatudu ona kualifikasaun ka hatudu ona rezultadu peskiza kona-ba hahán sira ne’ebé mak iha kontamina ho formalin. Agora ita presiza mós UNTL atubele hatudu mós rezultadu sira hanesan ne’e atu bele garante kualidade no kapasidade sira nune’e bele eleva kualidade iha universidade nia laran,” Bianco argumenta.

Entretantu, Ministru Ensinu Superiór Siénsia no Kultura (MESSK), José Honório Jerónimo hateten atividade peskiza ne’e kuaze universidade no instituisaun públika no privada sira halo hotu tuir ida-idak ninia materia peskiza. Programa sira-ne’e Institutu Nasionál Siénsia no Teknolojia (INCT, sigla Portugés) mak realiza depois mak fó ba universidade sira atu implementa. Ne’e duni, rezultadu ne’ebé kada universidade sira implemenata ne’e  kuaze iha hotu maibé ida-idak halo tuir sira-nia área peskiza.

Husi rezultadu ne’ebé peskizadór sira prodús ne’e, nia esplika, kuaze submete hotu ona ba kada ministériu sira nune’e bele sai matéria ida ba futuru bainhira ministériu sira hakarak halo estudu ruma ka halo programa ruma bele foti referénsia husi rezultadu peskiza ne’ebé mak peskizadór sira husi kada universidade prodús ona.

Jornalista: Tomé Amado

Editór: Rafael Ximenes de A. Belo