POLÍTIKA

PN autoriza Governu emite dívida públika millaun $500 ba konstrusaun infraestrutura estratéjika

PN autoriza Governu emite dívida públika millaun $500 ba konstrusaun infraestrutura estratéjika

Prezidente Parlamentu Nasionál (PPN), Maria Fernanda Lay. Imajen Tatoli/António Daciparu.

DILI, 19 dezembru 2024 (TATOLI)-Parlamentu Nasionál (PN), tersa ne’e, aprova dívida públika iha proposta-lei Orsamentu Jerál Estadu (OJE) 2024 iha espesialidade ho votu a-favór 41, kontra 11 no abstensaun 12.

Iha proposta-lei OJE 2024 iha artigu 5.º Dívida Públika, iha alínea 1 hateten durante iha tinan 2024, Governu autorizadu kontrata ou emite dívida públika ho montante másimu millaun $500 ho prazu másimu tinan 40.

“Nune’e artigu 5 Dívida Públika pasa,” Prezidente Parlamentu Nasionál, Maria Fernanda Lay, fó sai iha sala plenária PN iha debate proposta OJE 2024 iha faze espesialidade.

Iha alinéa 2 ne’e hateten durante tinan 2024, para além konstrusaun infraestrutura estratéjika, Governu autorizadu kontratra empréstimu iha área explorasaun, refinasaun no transporte petróleu no gás no investimentu asosiadu, edukasaun, saúde, formasaun, agrikultura, transporte, turizmu no enérjia renovável.

PN mós aprova ho votu a-favór 41, kontra 16, abstensaun hitu (7) ba proposta-lei OJE 2024 iha artigu 6.º Garantia ne’ebé prevista katak, durante tinan 2024, Governu fica autorizadu konsede garantia hosi Estadu até ho montante másimu millaun $80.

Deputadu FRETILIN, Antonino Bianco, husu atu esplika detallu kona-ba artigu 5.º Dívida Públika, ne’ebé Governu autorizadu kontrata ou emite dívida públika ho montante másimu millaun $500 ho prazu másimu tinan 40.

Ministra Finansa, Santina Cardoso, hateten ba dívida millaun $500 no ko’alia kona-ba presipísiu fiskál hanoin mós atu asegura reseita futuru nian tanba ne’e mak ita husu PN atu bele autoriza Governu bele mobiliza dívida ho totál millaun $500 liuliu ba dezenvolvimentu Kosta Súl nian, hanoin detallu depois ba projetu Ministru Petróleu no Rekursu Minerál bele esplika.

Iha parte seluk, nia mós informa, hosi 2012-2017 dívida públika hamutuk millaun $371.6 maibé iha 2018-2023 iha millaun $653 ne’ebé mak ba projetu estrada, edukasaun bázika, bee no saneamentu, aeroportu no eletrisidade maibé ba projetu sira hotu ne’ebé mai hosi dívida millaun $653 ne’e barak mak ninia andamentu la’o nene’ik loos hela.

Ne’eduni hakarak esklarese Governu tama, Primeiru-Ministru fó instrusaun liuhosi Konsellu Ministru atu bele halo revizaun lai ba hirak ne’ebé nia andamentu lao nene’ik hela, asina tiha ona maibé projetu detallu dezeñu seidauk iha, balun problema rai seida’uk rezolve, kestaun sira-ne’e halo asina tiha ona akordu entaun tenke selu fee ne’ebé akontese.

Enkuantu, antes ne’e relatóriu paresér apresiasaun inisiál ba proposta-lei OJE 2024 hosi komisaun C trata asuntu Finansa Públika iha PN, rekomenda ba Governu prosede urjente regulasaun lei númeru 13/2011 ne’ebé aprova Rejime Dívida Públika hodi dixiplina área espesiál komplesidade, atualmente permite ba Estadu, iha momentu Governu rekore modalidade finanseiru públiku ho nesesáriu salvaguarda sustentabilidade finansa públika ba jerasaun tuir mai.

Komisaun C ninia opiniaun ho autorizasaun PN fó ba Governu hodi subskreve to’o millaun $500 dívida públika adisionál, nune’e rekomenda ba Governu mantein transparánsia iha relasaun jestaun dívida no inklui fornese informasaun detallu kona-ba utilizasaun empréstimu, projetu finansiadu no planu para pagamentu dívida previamente subskriasaun emprestimu externu foun.

Komisaun C destaka posíbel ‘área cinzeta’ iha relasaun autorizasaun dívida por sub-setór Estadu, nune’e rekomenda ba Governu destaka estabelese limite klaru no prosedimentu transparante ba autorizasaun dívida por sub-setór, garante akordu ho mellor prátika no ho konformidade ho lei existente.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!