ME bandu eskola sira kontrata profesór
DILI, 22 dezembru 2023 (TATOLI) – Ministériu Edukasaun (ME) hasai ona despaixu ba eskola sira iha territóriu nasionál hahú tinan 2024 atu la halo kontratu ba profesór sira tanba ministériu iha ona planu loke vaga bolsa kandidatu ba profesór 3.000.
“Ne’e ba eskola sira ne’ebé mak menus profesór. Laiha tan obrigasaun husi eskola atu halo kontrata ho profesór sira tuir ida-idak nia hakarak. Ha’u husu ba dirijente eskola sira hotu hahú husi nível edukasaun pre-eskolár ba to’o iha sekundáriu jerál no tékniku vokasionál kuandu menus profesór sei laiha tan eskola ida mak bele foti desizaun mesak hodi halo kontratu no fó voluntáriu ba profesór sira tuir idak-idak nia hakarak,” Ministra Edukasaun, Dulce de Jesus ba jornalista sira iha salaun VIP ME, Vila Verde, sesta ne’e.
Notísia relevante: Profesór Kontratadu ezije mantein Dekretu Lei Rejime Espesiál, ME konsistente ho vaga
Dulce esplika katak Minstériu Edukasaun fó-sai ona númeru kuadru pesoál ho loloos ba eskola sira no husu ba kada eskola atu haree ho didi’ak númeru kada sala aula, númeru alunu inklui númeriu profesór tanba kuadru pesoál ne’e kompletu hotu ona.
Bainhira eskola ida ninia númeru profesór menus, nia apela, dirijente eskola sira iha obrigasaun tenke informa ba ministériu depois Ministériu Edukasaun mak sei uza ninia responsabilidade tomak atu koloka profesór sira bá iha eskola refere tuir nesesideade ne’ebé iha.
Tuir planu no polítika ministériu nian, hahú tinan oin (2024), entre janeiru-fevereiru, sei loke teste bolsa kandidatu ba profesór sira. Eskola sira kuandu presiza profesór, ministériu sei foti husi bolsa kandidatu ne’ebé ME prepara ona hodi koloka ba eskola sira tuir duni nesesidade ne’ebé eskola presiza.
“Husu ba dirijente eskola sira atu kumpre regra ka despaixu ne’ebé mak ministériu fó-sai ona atu nune’e labele hamosu fali problema iha futuru,” Dulce realsa.
Jornalista: Tomé Amado
Editór: Rafael Ximenes de A. Belo
