DILI, 22 dezembru 2023 (TATOLI) – Kardeál Arkidioseze Metropolitana Dili, Dom Vírgilio do Carmo da Silva SDB, konvida sarani hotu habesik aan ba prezepiu Natal hodi haree kosok-oan nia moris fatin, balada han fatin.
“Konvida ita hotu atu haksolok hamutuk iha loron ne’ebé Maromak mai vizita nia povu harii nia tenda iha ita le’et, horik ho ita, tama iha ita ema nia istória, atu la’o hamutuk ho ita, salva ita no lori ita fila ba Maromak. Natal katak festa hamutuk nu’udar maun-alin no bin-feton. Hamutuk selebra iha domin unidade no dame nia laran”, Dom Vírgilio do Carmo da Silva SDB husu iha nia mensajen Natal no tinan 2024 nian liuhusi konferénsia imprensa, sede episkopál iha Lecidere, Dili, ohin.
Kardeál esplika, Natal konvida ema hotu simu prezente Jezus nian lori buat foun hanesan, dame, justisa, lia-loos, fraternidade no perdaun.
Líder igreja Katólika ne’e husu ba ema hotu atu refleta hamutuk importánsia hosi selebrasaun Natal ne’ebé monu dala ida iha tinan ida, tanba ne’e presiza hatene kle’an sentidu klean hosi Natal.
“Natal labele sai liafuan mamuk ema ko’alia ba malu ka múzika divertimentu no dansa troka prezente, maibe Maromak nia domin ba umanidade ne’ebé Maromak haruka nia mane atu hasai ita hosi nakukun, sala no mate nia ukun, Maromak halo nia aan hanesan hodi ema bele mos sai hanesan Maromak”, nia reforsa.
Kardeal refere, uainhira ema moris iha divizaun, diskordia, egoizmu, rivalidade no inamizade halo ema hadook aan hosi Maromak no maluk sira, ida ne’e la’ós sentidu Natal.
Dom Vírgilio do Carmo da Silva SDB hateten, se ema la simu evanjellu sai sentru, mak kontinua iha injustisa sosiál no tentativa ba violénsia.
Nia refere, Jesus no evanjellu tama iha ema nia moris signifika ema hatene hatuur metin ema nia opsaun morál fundamentál iha Jezus hodi sai pontu referénsia ba ema nia moris iha eskolla no desizaun ba vida profesionál, familiár, sosiál no pesoál.
Ikusliu, nia dezeja ksolok Natal tinan 2023 no tinan foun 2024 nakonu ho bensaun Maromak nian lori hakmatek ba uma-kain iha rai-doben Timor-Leste no timoroan hotu iha rai-li’ur hanesan iha Austrália, Inglaterra, Irlandia Norte, Repúblika Irlanda, Koreia Sul no Portugal no rai sira seluk.
Notísia relevante:PM Xanana apela joven respeita natál hodi hatudu domin ba família
Jornalista: Jesuína Xavier
Editór: Rafael Ximenes de A. Belo
