VIQUEQUE, 29 dezembru 2023 (TATOLI)-Koodenador Veteranu husi suku Uaitame, postu adiministrativu Uatulari, munisípiu Viqueque, Pedro Lopes, husu Joven sira iha postu Uatulari mantein no kria unidade no dame hodi simu tinan foun.
“Tempu agora ita la’ós hirus malu no mura-murak ba malu, maibé iha tempu Natál no simu tinan foun ida-ne’e ita tenke kria pás iha ida-idak aldeia no suku. Se ita hirus malu mak lori tama ba tinan foun ha’u sente ladun di’ak ba ita. Tanba ne’e, ha’u husu ba joven sira no inan -aman sira agora ba oin, ita hamutuk hodi hateke ba oin, liuliu iha postu adiministrativu Uatulari”, Pedro Lopes, ba Agência Tatoli, postu Uatulari, sesta ne’e.
Pedro hateten, ema hotu tenke hamutuk hodi kria pás no estabilidade, hodi simu tinan 2024 ne’e.
Iha fatin hanesan, Eis-deputadu bankada Fretilin, Manuel Gaspar, husu joven Uatulari tenke hatudu hahalok ne’ebé di’ak tanba situasaun ne’ebé foin lalais akontese problema iha suku Afaloikai no Macadique.
“Tanba ne’e, ha’u husu ba joven sira tenke hatudu karakter ne’ebé di’ak durante iha loron-boot nian laran Natál ita liu ona, ita sei simu tan tinan foun nune’e joven sira tenke hanoin didi’ak,” nia hato’o.
Nune’e eis membru órgaun lejizlativa ne’e dehan, joven ida nia hahalok, kria problema iha suku laran, halo suku ne’e naran sai fo’er iha sosiedade nian leet tanba ne’e ba joven sira sukat hahalok liuliu tinan foun nian laran.
“Tanba tempu uluk funu joven hotu hamutuk ho fuan laran ida de’it hodi defende nasaun hodi oin ita hetan liberdade. Ho nune’e funu hotu ona, ha’u prefere, joven sira tenke halo tuir joven rezisténsia sira-nia luta ba kontribusaun ukun rasik an. Ha’u hakarak se bele joven agora halo di’ak liu joven sira uluk rezisténsia tanba joven matenek barak, kompara tempu uluk matenek uituan,” nia ko’alia.
Tuir dadús husi Polísia Nasionál Timor Leste (PNTL) munisípiu Viqueque, iha loron 24 kalan rejista kazu konfrontu akontese área suku rua iha kapela suku Macadique suspeitu na’in hitu no konfrontu kapela Uatulari Atas Afaloikai ho Babulu suspeitu na’in hitu totál suspeitu hamutuk na’in 14 maka PNTL aprezenta ona Ministériu Públiku (MP) hodi hein prosesu.
Notísia relevante:Konfrontu Uatulari, PNTL detein ona suspeitu no aprezenta ona ba MP
Jornalista : Vitorino Lopes da Costa
Editór : Rafael Ximenes de A. Belo
