Saudozu Nicolau Lobato hanesan patrimóniu Timor-Leste
DILI, 31 dezembru 2023 (TATOLI) – Família saudozu Nicolau Lobato, Rogério Lobato, hateten, Nicolau Lobato hanesan patrimóniu Timor-Leste nian tanba ne’e fó fiar ba Governu atu bele buka tuir restu mortais hodi bele halot.
Rogério Lobato hatutan, matebian barak mak sira-nia ruin sei toba hela iha udan-laran no loron-okos, ne’ebé família no Governu seidauk hetan hotu inklui saudozu Preziente Nicolau Lobato.
“Família nia dezeju mak oinsá hakarak foti ka lori Prezidente nia ruin mai hosi ne’ebé de’it, família nia preokupasaun mak ne’e. Maibé, dalaruma família nia hakarak ne’e lato’o. Família nia hakarak tenki tau hamutuk ho Estadu nia hakarak, tanba Prezidente Nicolau Lobato la’ós família Lobato nian de’it. Nia sai hanesan patrimóniu Estadu Timor-Leste nian. Ne’ebé, fó fiar ba Governu sei hetan dalan”, Rogério Lobato hateten ba Tatoli, iha komemorasaun loron Nasionál Eroi nian, iha rotunda Prezidente Nicolau Lobato, Comoro, ohin.
Eis-governante ne’e garante no fiar katak Xefe Governu atuál sei halo esforsu tomak hodi buka tuir restu mortais tanba sai kompañeiru estudu no luta ba libertasaun nasionál.
“Ha’u fiar katak Primeiru-Ministru Kay Rala Xanana Gusmão, nia sei halo esforsu tomak, tanba primeiru atu lori ema ida que sira na’in rua sempre hamutuk iha semináriu, sira na’in rua sempre estuda hamutuk. Segundu, sira hamutuk iha prosesu luta ba ukun rasik aan no terseiru iha ai-laran sira hamutuk no ita sempre hamutuk. Ne’ebé, ha’u senti katak Primeiru-Ministru sei lahaluha ida ne’e,” nia garante.
Nia fiar katak Primeiru-ministru sei hetan dalan loos oinsá atu hetan Prezidente Nicolau Lobato nia ruin hodi mai Timor, atu bele halot.
Iha fatin hanesan, José Lobato, oan hosi Saudozu Nicolau Lobato, hateten, sei lalakon esperansa, Governu sei esforsu hodi hetan ruin saudozu nian.
“Esperansa mak, ikus, ita labele lakon esperansa”, José Lobato garante.
Notísia relevante:Komemora loron Nicolau Lobato mate hodi dignifika eroi libertasaun pátria
Jornalista: Jesuína Xavier
Editór: Rafael Ximenes de A. Belo
