DILI, 12 dezembru 2024 (TATOLI)–Konstrusaun Uma laku no reablitasaun Jardín Faról ne’ebé konstrui hosi empreza Seven Star Dini, sesta ne’e, nakloke ona ba públiku atu asesu, tanba empreza hetan ona despaixu hosi Ministériu Obra Públika (MOP).
Notísia Relevante: Seven Star esforsa hodi finaliza reabilitasaun jardín Faról no entrega ba Governu
Enjiñeiru empreza Seven Star Dini, Ambrosio Gama, hateten jardín Faról inklui kadeira sira hatuur iha jardin laran ne’ebé lahateke ba tasi maibé hateke fali ba estrada edifísiu TATOLI, I.P, Komisaun Antí-Korrupsaun (CAC, sigla portugés) no Prezidente PN nia rezidénsia ne’e, konstrui bazeia ba Planta no Kadernu Enkargu (Bill of Quantity; BoQ) hosi Governu.
“Kadeira sira be hatuur iha jardín Faról laran ne’e, konstrui bazeia ba BoQ. Iha tersa 16 (tersa-feira) semana oin, ekipa konjunta Ajénsia Dezenvolvimentu Nasionál, Sekretaria Esadu Are no Kultura no Ministériu Obra Públika sei halo inspesaun final depois no liu loron rua ka tolu entrega ba hala’o termu entrega,” Ejiñeiru Ambrosio Gama hateten ba Agência Tatoli iha Jardin Faról.
Ambrosio Gama hateten, despaxu Gabinete MOP fó ona ba empreza atu bele loke jardín, tanba ne’e mak traballadór sira loke ona kalen didin ba iha obra.
“Ami loke horikalan jardín ne’e, tanba fízikamente atinje ona 100%. Maibé kuandu ita loke ona, signifika ita loke ba públiku bele tama. Ita labele interven ona,” nia dehan.
Maske jardin loke ona ba públiku maibé empreza kontinua koloka nia traballadór hodi kontinua tau matan ba jardín to’o termu entrega mosu no hein tempu atu entrega.
Tanbasá reabilitasaun jardín Faról ne’e la kompletu ho sintina públiku, nia hatán, ida-ne’e reabilita bazeia ba Planta no Kadernu Enkargu (BoQ) hosi Governu tanba área ba jardín fatin ba ema importante no bainhira populasaun kuidadu utiliza sintina públiku ne’e mak bele estraga fatin refere.
Serimonia ba konstrusaun Uma Laku no reabilitasaun jardín Faról hahú konstrui iha 06 fevereiru 2023, ne’ebé MOP no SEAK prevee osan hamutuk $422.653.
Notísia Relevante: Reabilitasaun jardín Farol labele finaliza tuir kontratu, empreza husu estende tan
Jornalista : Jesuína Xavier
Editór : Cancio Ximenes
